Tuesday, April 9, 2013

TAÐ REYÐA TRÆIÐ (heilsan til Jóanes)


Tað reyða træið
sendir sínar røtur út í aldurnar
og niðan í grøna teigalendið, har spurningarnir halda til,
har gummistivlarnir eru einastu tempulsúlurnar
vit eiga í Føroym.
Tað reyða træið breiðir sína krúnu
yvir svongu sálirnar
í útryðjuni á himmalsku fløtunum.

Reyðu fruktirnar og reyðu bløðini
og reyða sevjan blaktra í mergjaðu fløggunum,
sum gátuførir yrkjarar planta
á rúkandi leivdirnar av kryplaðum valdsharrum.

Reyðu trøini kunnu sagast sundur til plankar
sum stevna inn í dreymarnar.
Reyðu trøini kunnu verða tilfar
til brúgvar av svongum orðum,
ella tey kunnu nýtast sum pinnabrenni
til sosialismuna.

Eisini kirkjurnar á havsins botni eru gjørdar úr sama tilfari.
Reyðu trøini kunnu eisini eltast saman til tapet
millum øldir ella til bøkur, ið reka ódnir av
yvirfløddum ótta gjøgnum gøturnar.

Reyða flaggið er eisini
hjartað í tí fyrsta reyða trænum.


                                         Alexandur Kristiansen