Minnið

Til leygardagsins listablogg hava vit funnið ein sang, sum javnan er at hoyra í útvarpinum. Høgni Lisberg hevur gjørt hann og framførir saman við Eivør. Hetta er ein sangur, sum fyrst tú hoyrir hann, tykist næstan ørkymlandi einfaldur at kalla simpul. Men sangurin við insisterandi, einføldu reglunum vaksur inni í høvdinum á lurtaranum, lurta bara her:

(KP)

Transatlantisk Konsert í Norðurlandahúsinum

Leygarkvøldið 3.mai klokkan 21 verður transatlantisk konsert í Norðurlandahúsinum, har stóri salurin við plássi fyri 800 standandi áhoyrarum verður brúktur fyri geva pláss til rørslur og dans. Á pallin koma føroysku BYRTA og Greta Svabo Bech umframt íslendsku Retro Stefson. Special Guest Star: Brynjolfur! Kostnaður 150 kr.
Í sambandi við 30 ára hátíðarhaldið hjá Norðurlandahúsinum í fjør varð skipað fyri elektrokonsert við bólkum úr Føroyum og Íslandi. Norðurlandahúsið var fegið um at bjóða fyrstu almennu framførsluna hjá føroysku elektroduoini Byrta, og aftur í ár eru tey týðandi partur av skránni, har stóri salurin við plássi fyri 800 standandi áhoyrarum verður brúktur fyri geva pláss til rørslur og dans. Spennandi føroyska tónlistakvinnan, Greta Svabo Bech, er eisini á skránni, og íslendski bólkurin hesa ferð er Retro Stefson, sum altíð hugtekur áhoyraran við sínum glaða tónleiki og lívligu pallframførslu.

Tónaskald í listarligum undanvindi talar at...

Sunleif Rasmussen, tónaskald og musikkskúlalærari hevur ongar vónir um, at farið verður undir at byggja ein nýggjan musikkskúla í næstum, hann ivast í, um Tórshavnar Kommuna veruliga hevur ætlanir um at byggja nýggjan musikkskúla. Musikkskúlaskipanin er sum kunnugt ein long successøga, um vit hyggja at tí árini, sum skúlin hevur havt á tónleikastøðið her á landi. Tey, sum ikki brúka musikkundirvísingina í eini tónleikaligari karrieru, gerast jú hollir áhoyrarar og hetta er eisini við til at hækka um støðið á tónleikinum sum heild. Í útvarpinum hjá Kringvarpinum segði Sunleif Rasmussen í gjár, at hann ikki ætlar sær til arbeiðis í Musikkskúlanum undir teim vánaligu umstøðum, sum bæði húsini á Frúutrøð og Yviri við Strond í løtuni eru merkt av við m.a. manglandi plássi og ljóðisolering, sum hevur við sær, at musikkfrálæran verður órógvað av gangi. Og meðan støðan stendur við og versnar tykist Tórshavnar Kommuna ignorera teir mongu borgarar, sum standa á bíðilista at sleppa í musikkskúla, hesin bíðilistin er enn longri enn bíðilistin at sleppa á eitt ellisheim í kommununi. Vónast má, at okkurt verður gjørt við hetta mál í stundini, tí vit hava longu bíða alt ov leingi. 

Sunleif Rasmussen fer neyvan at keða seg, um hann ikki undirvísir í Musikkskúlanum eina tíð, hann hevur úr at gera við tónasmíð. Fløgan við tónleiki hjá Sunleif Rasmussen “Motion/Emotion” hevur eisini fingið sera positiv ummæli uttanlands. Ummælarin hjá audaud.com, Daniel Coombs er tildømis hugtikin av tónleikinum, sum hann heldur vera kompleksan og sum skyggir eins og norðlýsi. Stóra bretska tíðarritið Gramophone hevur eisini umrøtt Sunleif Rasmussen og tað hevur Seismograf eisini - tað æt einaferð Dansk Musiktidsskrift í eini grein, sum er eitt estetiskt kjakinnlegg og ummæli í einum. Sunleif Rasmussen heldur serliga tað seinasta vera áhugavert: - "Tað er týðiligt, at ummælarin, ein ungur starvsfelagi ikki er samdur við mínari estetisku støðu anno 2014. Hetta er næstan sum at lesa kjakið í "Neue Zeitung fur musik" millum Shumann/Brahms á einu síðuni og Liszt/Wagner á hinari. Stuttligt at slíkt kjak er ein verandi stødd." heldur Sunleif Rasmussen. (sí greinina í leinkinum niðast á blogginum)

Sunleif Rasmussen er í løtuni í gongd við at skriva sína Symfoni nr 2, sum skal latast forlagnum í mars komandi ár. Symfoniin er umbiðin av Helsinki Filharmonikarunum til 150 ára jubileið hjá Sibelius. Konsertirnar verða 9. og 10. septembur í 2015. Sunleif greiðir frá: "Symfoniin verður fyri stórt orkestur, mannskór og tveir sangsolistar. Ein baryton og ein koloratursopran. Barytonsangarin verður tann víðagitni Bo Boje Skovhus og kendi koloratursopranurin Cyndia Sieden, ið syngur á Metropolitan operuni í New York. Havi verið so heppin, at fáa fríar hendur at velja solistar. Teksturin er úr Vøluspá og Gylfaginning, og eru tekstir um "Lívsins træ" nevnt Yggdrasill. Træið, ið røkkur til himmals og niður í Ásagarð, Jotunheim og Helheim, og fara hesir heimir at lýsa teir 4 satsirnar í symfoniini. Eg eri í holt við fyrsta sats í løtuni. Komi stórt sæð bert at skriva symfoniina í ár.  Tó eri eg eisini í gongd við at skriva eitt  minni verk fyri blokkfloytu og strúkiorkestur, til Michala Petri og Lappland Chamber Orchestra. - Og nú vit tosa um fløgur hevur Dacapo-records avgjørt at gevar út eina live upptøku av symfoniini á frumframførslunum í Helsinki" leggur Sunleif Rasmussen aftrat. Vit  ynskja honum góðan arbeiðshug og eydnu og vóna, at gongd kemur á ein ítøkiligan nýggjan musikkskúlabygning, so at bæði Sunleif og vit øll kunnu njóta gott av teimum mongu positivu ringárinum, sum ein góður musikkskúli hevur fyri landið og høvuðsstaðin.

http://audaud.com/2014/02/sunleif-rasmussen-motionemotion-lapland-chamber-orch-wind-quintetjohn-storgards-dacapo/

http://gramophone.co.uk/node/117679/media-detail

http://seismograf.org/anmeldelse/rasmussens-monologer

(KP)

Tuxedo Rebels bjóðar til lurtigildi

Í sambandi við at debut plátan hjá Tuxedo Rebels, Sometimes The World Is Dark, kemur út, verður boðið til lurtigildi í Sirkus mikukvøldið 16/04 kl 21.00. Vit fara í felag at njóta serstaka undanfrumspæling av plátuni, áðrenn hon yvirhøvur er komin til landið. Gjørligt verður at pre-ordra plátuna á kvøldinum, og við pre-ordranum fæst download kota, ið kann nýtast beinavegin. Tuxedo Rebels er ein bólkur, sum er mannaður av Petur Pólsson. Tuxedo Rebels er mannaður av Petur Pólson og Knút Háberg Eysturstein. Teir fingu hugskotið til bólkin longu í 2002, tá Petur spældi í Clickhaze og Knút spældi í Gestum. Teimum dámdu væl at spæla tøkuløg hjá fyrimyndum og hetjum, so sum Bob Dylan, Leonard Cohen, Johnny Cash, Neil Young o.ø. Teir framførdu í ymiskum samanhangum í nøkur ár, men tosaðu javnan um at fara at gera egnan tónleik og geva út. Nú er hetta vorðið veruleiki - tónleikurin kann  hoyrast í Sirkus í kvøld. Knút Háberg Eysturstein greiðir frá, at tankin við eini undanfrumspæling er at samlast og at fáa eina sosiala hending burturúr hesum, at plátan verður presenterað. Í talgilda heiminum er tað at lurta eftir tónleiki ofta individuelt og fragmentariskt og Tuxedo Juncion hava hug at fara hin vegin og gera hendingina til nakað, sum gongur fyri seg í einum rúmi og sum fólk savnast um. Øll eru vælkomin. 

(KP)

Tríggir føroyskir tónleikarar við í P2 tónleikakapping

Í dag klokkan 10.30 byrjar kamartónleikakappingin hjá P2 og ikki minni enn tríggir føroyskir tónleikarar eru við í kappingini í trimum ymiskum ljómliðum. Heiðrun Petersen spælir violin og er partur av Nordic Spring Quartet, Jákup Lützen spælir bratsj við KAMMERTONEN, Niklas Kallsoy Mouritsen spælir horn í Emanon Blæsikvintettini. Vit ynskja øllum góða eydnu og gleða okkum til at fylgja við. Undanumfør í kappingini ganga fyri seg í studio 2 í konserthúsinum og tað ber til at vera staðar, atgongumerki kosta einans 50 kr. Lesið meira her:

http://www.dr.dk/Temaer/p2_kammermusik/2014/04/08/135329.htm

(KP)

Vár við føroyskum samtíðartónleiki

Tónleikabólkurin Aldubáran hevur árligu várkonsertina í Listaskálanum sunnudagin 30 mars kl 16.00. Á skránni eru hesi verk.

Edvard Nyholm Debess: Heyst við frostnátt
Kristian Blak: Stjørnur
Kári Bæk: Hugleiðingar
Andras Spang Olsen: Náttarsangur til Á - FRUMFRAMFØRSLA
Pauli í Sandagerði: Intermezzo nr. 1
Ólavur í Búrstovu: 3 Bagatellir
Regin Winther Poulsen: Meldursmyndir

Tónleikarar eru:
Andrea Heindriksdóttir, tvørfloyta 
Malin Klingborg, oboe
Anna Klett, klarinett
Páll Sólstein, horn
Christina Andersen, fagott

1-0 til (country)poppin

Mær dámar væl uppleggið hjá FMA, sum er at fagna tónleikinum, tí tað hava tónleikararnir uppiborið. Eg haldi eisini, at tað, eg hoyrdi gjøgnum teldu og útvarp í gjár gav kensluna av einum góðum showi, har stórur dentur varð lagdur á rúmligheit, at inkludera t.d. klassiskan tónleik og kórsang. Teir báðir vertirnir, Eyðfinn Jensen og Barbara Holm riggaðu og dugdu væl, ljóðið var framúr, tað eg hoyrdi (tann útmerkaða stroymingin frysti viðhvørt) og framførslurnar vóru sum heild serstakliga góðar, ikki minst vóru áskoðararnir hugtiknir av endanum, tá Simme varð heiðraður, og Hanus G.Johansen og Cantabile framførdu.  

FMA er í útgangsstøði ein bastardur, ein poppkapping, sum eisini í kraft av, at hon verður hildin í Norðurlandahúsinum og við plássi fyri kórsangi, klassiskum tónleiki fær størri tign, og tað er gott og ein styrki, tí at tá verður rúm fyri listarliga áhugaverdum innleggum, sum vit upplivdu í gjár. Men næstu ferð mugu vit ansa eftur, at listin ikki í eins stóran mun verður við undirlutan. Um vit skulu seta tað eitt sindur fýrkantað upp, kunnu vit siga, at tað serliga var (country)poppur og fólksligi tónleikurin, ið var við yvirlutan í gjárkvøldið, klassiski parturin var bara eitt slag av prýði, jazzurin var als ikki til staðar, og tað er fullkomiliga absurd, at Teitur og ein útgáva sum Story Music ongan heiður vann, sama er galdandi fyri Kára Sverrison og Bendar Spónir. Næstu ferð má FMA skipast eitt sindur øðrvísi, so at bæði fólksins sms-rødd og listarliga góðskan verða tryggjað við uppibornum heiðurslønum. 

(KP)

Eivør við íblástri úr Bíbliuni

Í dag kom ein sangur út hjá Eivør í sambandi við, at danska bíbliufelagið hevur 200 ára jubileum. Fleiri ymisk fara at gera sangir við støði í bíbliuni, Eivør hevur tikið støði í Sálma 138, hoyrið dramatiska, vakra sangin You know me her:

http://www.bibelselskabet.dk/Boghandel/Varekatalog/LYD02

1Til songmeistaran. Eftir Dávid. Sálmur. HARRI, Tú rannsakar meg og kennir meg!2Tú veitst, nær eg siti, og nær eg standi; Tú skilir hugsan mína langan veg.3Tú hevur greiði á, hvar eg gangi ella liggi, og allar vegir mínar kennir Tú gjølla.4Tí áðrenn orðið er til á tungu míni - ja, tá veitst Tú tað til fulnar, HARRI!5Aftanfrá og frammanfrá heldur Tú tvørtur um meg, og Tú leggur hond Tína á meg.6At skilja hetta er mær ov undurfult; tað er ov høgt, eg eri tað ikki mentur.7Hvar skal eg fara undan Anda Tínum, og hvar skal eg flýggja undan ásjón Tíni!8Fari eg upp til Himmals, so ert Tú har, og reiði eg mær legu í deyðaríkinum - ja, so ert Tú har;9taki eg veingir morgunroðans, og festi eg búgv við ytsta mark havsins,10so leiðir hond Tín meg har við, høgra hond Tín heldur mær føstum.11Og sigi eg: "Myrkrið skal fjala meg, ljósið rundan um meg skal verða nátt!"12so er heldur ikki myrkrið Tær myrkt, og náttin er bjørt sum dagurin, myrkrið er sum ljósið.13Tí Tú hevur skapt nýru míni, Tú virkaði meg í móðurlívi.14Eg takki Tær, at eg eri virkaður so ómetaliga undurfult; undurfull eru verk Tíni, tað veit sál mín til fulnar.15Bein míni vóru ikki Tær duld, táið eg varð skaptur í loyndum, virkaður í jarðardjúpinum.16Sum fostur sóu eygu Tíni meg, og í bók Tíni stóðu teir allir uppskrivaðir, dagarnir, ið ásettir vóru, áðrenn nakar av teimum enn var komin.17- Sum hugsanir Tínar eru mær dýrabarar, Gud, sum tær telja nógv, samanlagdar!18Um eg vildi talt tær - tær eru fleiri enn sandskornini; eg vakni, og eg eri hjá Tær enn!19Gud, hevði Tú viljað dripið hinar gudleysu! - Tit blóðmenn, víkið frá mær! -20teir, ið við svikaráðum í huga tala um Teg og nýta navn Títt til lygn, fíggindar Tínir!21Skuldi eg ikki hatað teir, ið hata Teg, HARRI! Skuldu teir ikki boðið mær ímóti, teir, ið reisa seg móti Tær!22- Við sterkasta hatri hati eg teir, teir eru fíggindar mínir við!23Rannsaka meg, Gud, og kenn hjarta mítt, royn meg og kenn hugsanir mínar!24Vita, um eg eri á vanlukkuleið, og leið meg hin æviga vegin!

http://www.bibelselskabet.dk/Boghandel/Varekatalog/LYD02


(KP)

Finala í Stella Polaris Tónleikakappingini

Í kvøld klokkan 19.00 verður finalan í Stella Polaris 2014 tónleikakappingini í Norðurlandahúsinum. Tey seks ungu, sum hava vunnið heiðurin at kappast í finaluni í tónleikakappingini eru: Alvi Joensen, guitar - Marta T Johannesen, floyta - Mattias Kapnas, klaver - Heiðrun Petersen, violin - Birita Poulsen, sang - og Ernst Remmel, trompet. Dómarar í kappingini eru: John Wallace, Michala Petri, Bo Isholm, Bernharður Wilkinson og Anna Sofía Restorff.

(KP)

Teitur: It´s not funny anymore

.

Sólin skínur á ljósasta dagin í longri tíð. Vit feira várvónir og gott lag við at spæla hendan yndisliga sangin hjá Teiti Lassen,Videolagið er komið í dag, tað varð filmað í Eindhoven í Hollandi, tá lagið varð tikið upp. Teitur syngur, Nico Muhly stjórnar Holland Baroque Society og vinum, sum framføra útsetingina hjá Van Dyke Parks av lagnum hjá Teiti. 

Recorded by Reyn. Directed and edited by Signe Tora Munck Bencke and Produced by Kristian Sonderby and Christian Ulf-Hansen for Arlo and Betty Recordings.






(KP)

Eitt ískoyti, men lítil endurnýggjan

Sigast kann,  at tað er stórhending, tá nýggj sálmabók, ella sum í hesum førinum, Sálmabókauppískoyti verður givið út. Í formælinum sigur nevndin um  verkætlanina, at uppískoytið einans er eitt “ávegis verk”, sum kan geva eina ábending um, hvussu sálmasongurin í Føroyum verður endurnýggjaður.

Leif Hansen, organistur í Vesturkirkjuni

Eitt uppískoyti

At savna, geva út og autorisera eina sálmabók er stórarbeiði og eigur at verða væl umhugsað og einans litið fólki upp í hendur, sum hevur skil fyri ymiskum tættum sálmasangi viðvíkjandi. Slíkt arbeiði verður ikki gjørt á hvørjum degi, og tí er uppískoytið at rokna sum fyrsta stig í arbeiðinum uppá at fáa til vega eina nýggja føroyska sálmabók. Eitt sálmabókaískoyti er nevniliga ikki nøkur nýggj sálmabók, men skal heldur fatast, sum nevndin eisini tekur til í formælinum: “eitt íkast frá okkara egnu tíð og ein ábending um, hvussu sálmasangurin kann verða endurnýggjaður.” Eitt uppískoyti eigur ikki ikki at verða fevnt av somu krøvum, sum vit seta til eina autoriseraða sálmabók. Úrvalið eigur at verða breiðari og heldur liberalari enn í einari veruligari sálmabók. Og tí skal hetta nýggja uppískoyti eisini metast út frá hesi treyt.

Sálmasangurin

Hetta at syngja saman hev­ur í øldir verið partur av felags­lívi hjá teimum, sum í Føroyum hava búð. Við sínari sjálvsøgdu savnandi og aktiverandi natúr, umframt at verða íborin eina kensluborna og hugburðsmyndandi kraft, er sálmasangur berandi lutur í protestantisku guðstænastuni. Sálmasangur kann í innihaldi vera sera ymiskur, men felagsnevnarin er, at her er tað kirkjuliðið, sum kemur til orðanna og verður aktiverað.  Sálmabøkurnar skula navigera í einum sera ymiskt samansettum kirkjuliði og verður tí ofta eitt kompromis millum áhugabólkanar innan kirkjuna. Avgjørt liggur tí onkur sálmur í boðskapi ella kvaliteti á pínumarkinum hjá onkran kirkjugangara. Kravið til nýggjar sálmabøkur eigur til eina og hvørja tíð vera, sum danski sálmagranskarin Henrik Glahn tekur til: “Fra mange sider lyder samtidig ønsket – eller kravet! – om fornyelse og aktualisering af salmernes poetiske og musikalske udtryk, en fornyelse i pagt med tiden.”

Sálmabókin frá 1990

Longu tá núverandi sálmabók kom í nýtslu í 1990 var eyðsæð, at hon í mangar mátar ikki talaði til samtíðina, og at sálmabókanevndin handan bókina var nóg so konservativ í sínari redaktión av bókini. Børnini og tey ungu vóru nærum gloymd og eyðsæð var at t.d. árstíðssálmanir, brúdleypssálmarnir og føstusálmanir ikki nøktaðu tann  tørv, sum kirkjuliðið hevði á slíkum sálmum. Føroyskt er ikki gamalt sálma-mál, og tí avspeglar føroysk sálmayrking í sera stóran mun danska traditión. Danskur sálmaskaldskapur hevur eyðvitað myndað sálmasang í Føroyum í 400 ár, og tí var tað natúrligt, at tað er tann danska tratitiónin, sum eisini mann teljast millum heimsins bestu, sum føroyskir sálmayrkjarar funnu sítt kjølfesti í. Bróðurparturin av sálmunum í sálmabókunum frá 1960 og 1990 eru tí sostatt týðingar úr donskum. 

Sálmaúrval

Ein málsetningur, sum nevndin handan uppískoytið ivaleyst hevur sett sær er, at fáa teir sálmar til vega, ið sjálvsagt áttu at verið í sálmabókini frá 1990. Uppískoytið kann tí í stóran mun fatast sum eina roynd at dagføra sálmasangin so, at hann í minsta lagið er á einum norðurlendskum 1990- støði. Sjálvur havi eg ofta undrast yvir, hvussu tað í sálmabók okkara bar til at umganga fleiri danskar kjarnusálmar hjá eitt nú Grundtvig m.a. “Tag det sorte kors fra graven”, “Giv mig Gud en salmetunge” og “Du, som går fra den levende Gud”. Hesir og fleiri aðrir kendir danskir sálmar fyriliggja nú á føroyskum og í høvuðsheitum í góðum týðingum. Nýggjari donsk traditión, sum í 1980’inum og 1990’inum varð introduserað í uppískoytum og endiliga kom í Den Danske Salmebog í 2002, er eisini at finna í bókini.  Nevnast kunna “Du, som gir os liv og gør os glade”  og “Du som har tændt milioner af stjerner”. Norski sálmayrkjarin Svein Ellingsen, hvørts sálmar eru blivnir kjarnusálmar bæði í heimlandinum, Svøríki og Danmark, er við sínum átta sálmum á veg inn í føroyskan sálmasang. Sera vælumtókti dópssálmurin “Fyldt av glæde over livets under”, verður í týðingini hjá Hera Tróndheim ivaleyst framyvir fastur sálmur, tá dópur er. Týðingar eru eisini bulurin í bókini. Av teimum gott 150 sálmunum eru bara gott 40 uppruna føroyskir. Av føroyskum yrkjarum kunna nevnast  Sólrun Michelsen sum eigur sjey sálmar, P.J. Sigvardsen fýra og Martin Joensen tríggjar. Millum hesar gott 40 upprunasálmar eru heilt víst nakrir, sum kirkjuliðini fara at taka til sín. Nýggi morgunsálmurin “Nú morgunsólin fevnir fjøll” hjá Sólrún Michelsen, hevur við sínum svenska summarsálmadámi heilt víst potentiale til at gerast eitt sálmahitt, kanska serliga um hann verður sungin til okkurt av svensku løgunum, sum passa og hóska til.

Sálmaløg

Flestu sálmarnir fylgja kendum versfótum og kunna tí syngjast til kend løg. Verður blaðað ígjøgnum bókina so sæst eisini, at tað í stóran mun verður víst til gomul og kend løg. Serliga beit eg merki í, at í seks av sjey sálmum hjá Sólrun Michelsen verður víst til gomul sálmaløg. Ein sjálvsagdur partur av einari endurnýggjan av sálmasanginum eigur at verða, at nýggj løg verða innsungin. At einans áleið 15 føroysk upprunaløg eru við í bókini er at undrast á. Eg skilji púrt einki av, at eitt nú Knút Olsen einans hevur tvey løg við í bókini. Serliga havandi í huga, at hann í 2012 lat úr hondum eitt savn við 65 sálmaløgum. Knút hevur t.d. nýtt lag til týðingina hjá P.J. Sigvardsen av íslendska “Slá þu hjartans hørpustrengi” í áðurnevnda lagsavni. Í Uppískoytinum verður ístaðin víst til “Jesus, tíni sár og pína” Genéve 1551. Nýtt í føroyskum sálmabókaútgávum er, at nótar eru skrivaði til løgini. Hetta eru nógv uttan iva glað fyri. Tó harmist eg um, at hvørki becifring ella tekstur er settur við nótanar. Hetta er heilt einfalt ikki nóg gott, og eigur at verða fingið í rætt lag um nýtt upplag skal prentast.  

Til børnini og tey ungu

Knappir 40 sálmar og sangir eru ætlaðir børnunum og teimum ungu. Verður sæð burtur frá frálíkum sálmum sum “Máni og sól”, jólasangunum og øðrum einstøkum sangum, so tykist ambitiónsstøðið hjá nevndini at verða út av lagi lágt, tá um henda týðandi tátt í sálmasanginum viðvíkur. Kendir og ofta hjálparleysir sunnudagsskúlasangir mynda í alt ov stóran mun barnatilfarið. Slíkir sangir kunna sjálvandi brúkast til sunndagsskúlaarbeiði, men hoyra ikki heima í einari guðstænastu. Krøv um poetiskan kvalitet eigur eisini at verða sett til barnasálmar og -sangir. Avspeglar Uppískoytið tað føroyska andaliga sangtilfarið fyri børn, so liggur eitt arbeiði fyri framman og bíðar eftir dugnaligum yrkjarum og sangskrivarum.

Lítil endurnýggjan

Eg loyvi mær at ivast í, hvørt málsetningurin hjá nevndini at geva eina ábending um, hvussu føroyskur sálmasangur kann verða endurnýggjaður, ber á mál við hesum uppískoytinum. Tann endurnýggjan, sum er at hóma, er ein endurnýggjan, sum kemur til okkum uttanífrá. Ein endurnýggjan, sum t.d. í Danmark byrjaði fyri 30 árum síðani. At endurnýggja sálmasangin hava føroyingar ongantíð sjálvir roynt, og tí skula vit ikki vænta at sálmayrking, lagasmíð og sálmasangur við eitt skal fara nýggjar leiðir. At eitt so fáment land sum okkara hevur fyri neyðini at hyggja út um landoddanar eftir sálmaskaldskapi er heldur eingin ólukka. Dygdarsálmar verða sum kunnugt týddir til nógv ymisk mál, og hevur tað eisini verið siðvenja heilt frá Luther’sa døgum. Tó er av størsta týdningi, at leitað verður við ljós og lykt, so vit ikki koma út fyri, at onkur føroyskur dygdarsálmur liggur eftir, og at tað, sum verður útgivið, bara er næstbest. Hetta seinna er at hóma í uppískoytinum. Kirkjunnar myndugleiki eiga at miða fram móti, at føroyingar fáa eina nýggja føroyska sálmabók í 2020. Við Uppískoytinum er hendan tilgongdin byrjað. Men Uppískoytið vísir okkum eisini á, at nógv arbeiði er eftir at gera, áðrenn tað fer at bera til hjá bispi at autorisera eina nýggja sálmabók.

Lurtið eftir KAMARTÓNANUM!

KAMMERTONEN eitur ein dugnalig donsk klaverkvartett við føroyska bratsjspælaranum, Jákupi Lützen, sum spælir saman við Amalie Elmark, violin, Marie Louise Lind, cello og Jonathan Siahaan, klaver. 

14 apríl eru tey vald út at vera við í háttvirdu P2 kappingini. Umframt Jákup verða tveir aðrir føroyskir tónleikarar við í kappingini við tveimum øðrum ensemblum; Heidrun Petersen, violin og Niklas Kallsoy Mouritsen, horn. 

Á heimasíðuni hjá DR stendur:

Over fire dage vil nogle af Danmarks største musiktalenter konkurrere om æren, koncertengagementer og kontante pengepræmier ved P2s Kammermusikkonkurrence. Hele forløbet kan følges live i Studie 2 med Rie Kock som vært. Finalekoncerten finder sted i Koncertsalen torsdag 17. april kl. 15.00.

Kammermusikkonkurrence har været gennembrud for flere af vores fornemste ensembler. Tidligere har ensembler som Trio Ismena, Den Danske Strygekvartet, Trio con Brio og Trio Aristos vundet konkurrencen, og hvert år er der nyt - ægte - talent at spotte. P2 sender direkte fra hele konkurrencen, så alle har lejlighed til at følge med.

Program (med forbehold for ændringer)

Mandag 14/4 kl. 11.30-18.30      1. runde
Tirsdag 15/4 kl. 11.30-18.30       1. runde
Onsdag 16/4 kl. 11.30-18.30       Semifinale (6 ensembler)
Torsdag 17/4 kl. 15.00-18.00      Finale (3 ensembler)

1) KAMMERTONEN
(Klaverkvartet)

Amalie Elmark, violin
Jákup Lützen, bratsch
Marie Louise Lind, cello
Jonathan Siahaan, klaver

2) Duo Psallein(Guitar Duo)

Mikkel Egelund, guitar
Simon Wildau, guitar

3) Nordic String Quartet(Strygekvartet)

Mads Haugsted Hansen, violin (DK)
Heidrun Petersen, violin (Fo)
Daniel Eklund, viola (Se)
Live Johansson, cello (No)

4) Trio Amerise(Blæsertrio)

Ragnhildur Josefsdottir, fløjte
Morten Sønderskov Jensen, klarinet
Lucia Amerise, fagot

5) Danish Chamber Brass(Messing-kvintet)

Andreas Jul Nielsen, trompet
Jeppe Lindberg Nielsen, trompet
Anne Sophie Broholt Jensen, horn
Theis Stoico, basun
Jonathan Borksand Hanke, tuba

6) Trio Colore(Klavertrio)
 
Xenia Kandel Frederiksen, klaver
Sofie Thorsbro Pedersen, violin
Benedicte Borum Poulsen, cello

7) inDuo
(Sopran/fløjte Duo)

Isabella Hübener, fløjte
Sofie Elkjær Jensen, sopran

8) Emanon Blæserkvintet (Blæserkvintet)

Eva Steinaa, obo  
Maria Steinaa, fløjte
August Lange Finkas Jensen, klarinet
Niklas Kallsoy Mouritsen, horn
Leopoldo Ferris Gomez, fagot

Hyggið at heimasíðuni her og lurtið eftir framúr góða ljóðbrotinum beint undir myndini. 

http://www.kammertonen.com/








(KP)

Mpiri við í vælumtóktari kamaropera

Alverden god Nat eitur kamaroperain ella tónleikasjónleikurin eftir Peter Bruun og Ursula Andkjær Olsen, sum føroyska kórið Mpiri tekur lut í, og sum verður framførd í hesum døgum 13- til 17.januar. Seinasta framførsla er í kvøld og hon er útseld. Tað er ikki bert heitið, sum er øðrvísi, tá tað snýr seg um Mpiri. Kórið hevur í tey 16 árini, tað hevur á bakið, verið við í nógvum ymiskum verkætlanum, og teimum dámar væl at bjóða vanliga kórkonsertforminum av. Hesa ferð mynda tey eitt kór av hungurstungnum fiskimonnum: 

Sopran: - Katrin Næss - Tóra Vestergaard - Eva Greve Klemmesen - Cecilia Nolsøe Poulsen - Astrið Gullborgardóttir Alt: - Johanna av Steinum - Sissal Clementsen - Gesche Picolin - Jensia Højgaard Dam Tenor: - Tóki Bjarkhamar - Tróndur Bogason - Bartal Nolsøe Poulsen Bass: - Dánial Hoydal - Bogi Mouritsen - Jónas Valdimarsson - Jákup Lützen Dirigent: - Erik Jakobsson

Her eru nøkur leinki og brot úr teimum framúr rósandi ummælunum. Vit ynskja Mpiri og øllum hinum í leikinum til lukku við góða úrslitinum. Kanska skuldu tit komið ein svipp til Havnar við allari baduljuni? 

http://www.figura.dk/forestillinger-2013-14alverden-god-nat

♥♥♥♥♥ - 5 hjerter i Politiken! med særdeles flotte ord fra Thomas Michelsen:
"Stundom hviler musikken bare under fortællingen som frosne dronetoner. Andre gange swinger den sig op og ud i rummet med rytmer, der vil have kroppen til at danse.”
“Komponist og librettist har kastet anker i fortællingens historiske bugt. De barske sømænd synger en from salme for at holde modet oppe, mens kulden tager magten. Men de gør det med et Peter Bruunsk tvist, der matcher tekstens Ursula Andkjær Olsenske, poetiske undersøgelse af maskulint og feminint. Af “overlevelsespunktet” og det “heroiske punkt” - som var det mandens svar på g-punktet" 

http://www.b.dk/musik/naar-soeen-gurgler-i-min-mund

***** Politiken

- Poetiske greb fra digteren Ursula Andkjær Olsen og en musik, der på samme banalt-enkle måde lader kendte klicheer gå nye planker ud, gør fortællingen om Jens Munks møde med Aktis følsom, erotisk og sjov.

5 hjerter i Politiken

**** Jyllands-Posten

 - Figura Ensemble river publikum med ombord på en dramatisk og poetisk sejlads blandt Nordhavets isfjelde. 
4 stjerner fra Jyllands-Postens Christine Christiansen

== Information ==
- Alverden god Nat spiller fem kvarter, og man må rose det samlede kollektiv for en forestilling, som holder tilskueren i ånde
http://www.information.dk/484705

**** Gregers Dirckinck-Holmfeldt

- Det er et smukt lille værk på en god time. Tonalt behersket, visuelt og dramatisk ubesværet
4 stjerner Gregers DH

http://politiken.dk/ibyen/anmeldelser/teateranmeldelser/ECE2182222/ny-arktis-opera-vrider-klicheer-af-led/

Nýggjárskonsertin 2014

Eg gleði meg til í kvøld at uppliva ta árligu nýggjárskonsertina hjá Føroya Symfoniorkestri, solisti og kóri. Hon verður framførd tvær ferðir, og er útseld í kvøld, men sambært heimasíðuni hjá Norðurlandahúsinum eru atgongumerki eftir til konsertina klokkan 15. Nýggjárskonsertin er savnandi og ítøkiligt dømi um ein sera sterkan vilja og dugnaskap, so at vit against all odds kunnu hava eitt symfoniorkestur. Sunleif Rasmussen samanbar í gjár í sjónvarpinum Symfoniorkestur Føroya við eina humlubi og tað er av sonnum lívsjáttandi og gleðiligt, at tað skal kunna bera til. Skráin er eitt satt marglætishorn, sum skuldi borga fyri eini sera fjølbroyttari og festligari konsert, sum fer at gleða tey flestu. Mær dámar sjálv so væl Nýggjárskonsertina, tí hon er eitt ítøkiligt dømi um at skúli loysir seg, og í hesum førinum hugsi eg sjálvandi um Musikkskúlan.  Á odda fyri Symfoniorkestri Føroya stendur Bernarður Wilkinson. Í vangamyndini í Degi og Viku í gjár varð hann spurdur um hvussu tað ber til, at tað yvirhøvur er grundarlag fyri at hava eitt tílíkt orkestur í einum so lítlum landi sum Føroyum. Bernarður Wilkinson tosar um ein brennandi áhuga fyri tónleiki og list, sum ger tað møguligt. Tað er imponerandi, heldur Benni. - Mentanin er tjóðarsálin, heldur hann og tí er týdningarmikið at investera í mentan. Framman fyri sjónvarpið í kvøld fari eg at fegnast um, at vit í síni tíð fingu eitt musikkskúla og at stødd eingin forðing er fyri at fara listarliga á flog, um rætt verður investerað.

http://kvf.fo/netvarp/sv/2014/01/10/140110vangamyndtilnet Skrá: Føroya Symfoniorkestur og Kór  Dirigentur: Bernharður Wilkinson  Solistur: Ekaterina Morozova – sopran Hjálparvenjari til kórið: Bjarni Restorff Dimitri Shostakovich Festive Overture J.S.Bach Wir singen dir in deinem Heer, Herrscher des Himmels úr Christmas Oratorio Antonin Dvorak Sangur til mánan úr Rusalka (solistur Ekaterina Morozova ) Ástor Piazzolla Primavera Portena ( Anna Hüdepohl, Accordion ) Pietro Mascagni Intermezzo úr Cavalleria Rusticana Vincenzo Bellini Qui la voce sua soave úr I Puritani (solistur Ekaterina Morozova ) Johann Strauss Perpetuum Mobile Giuseppe Verdi Triumphal March úr Aida Steðgur Giuseppe Verdi Overture úr La Forza del Destino Giuseppe Verdi Pace, Pace, mio Dio úr La Forza del Destino (soprano soloist Ekaterina Morozova )  C.Hubert H.Parry I was glad  John Williams Jurassic Park John Gardner Tomorrow shall be my dancing day Carlos Gardel Por una Cabeza ( Anna Hüdepohl, Accordion ) Frederick Loewe I could have danced all night úr My fair lady (soloistur Ekaterina Morozova ) Johann Strauss Radetzky March (KP)

Lurtigildi og ókeypis Okkara

Høgni Reistrup gav fyrr í mánaðinum út “Áðrenn vit hvørva”, og fríggjakvøldið kl. 21 verður lurtigildi í Sirkus. 

Tá fer Høgni at bjóða øllum vælkomnum, og síðani verður nýggja plátan løgd undir nálina og spæld úr einum enda í annan.

Tiltakið verður frá kl. 21-22, og henda tíman verður bjóðað ókeypis Okkara á krana.

Plátan verður eisini til keyps. 

“Áðrenn vit hvørva” er tikin upp í Berlin og Reykjavík. Teir báðir Janus Rasmussen og Ólavur Jákupsson hava framleitt.

Aftaná lurtingina, áleið kl. 22, verður yrkingarupplestur. Átta ymiskir yrkjarar lesa úr sínum verkum.

Ókeypis atgongd.

Les meira um tiltakið her: https://www.facebook.com/events/1397459573833778/

“Mr. Handel’s new Grand Sacred Oratorio, The MESSIAH”

                   

Leif Hansen

Eftir frumframførsluna av Messias vendi Lord Kinnoul sær til Händel og takkaði fyri undirhaldið. Händel svaraði: “Tað hevði harmað meg, um mín tónleikur bara var undirhald. Eg vildi ynskt, at tónleikurin hjá mær kundi gjørt fólk til betri menniskju”.
Í vikuskiftinum verður enn einaferð høvi til at hoyra stórverkið Messias, hesa ferð í Fuglafirði og í Havn.

Summarið 1741 var farið at halla tá Händel setti sær fyri at skriva enn eitt oratorium. Skjótt og væl gekk, tí longu seks dagar seinni legði tónaskaldið síðstu hond á fyrsta part. Níggju dagar seinni var annar partur liðugur og eftir knappa viku var triði partur frá hondini. Messias var ikki fyrsta og heldur ikki síðsta oratorium, sum Händel skrivaði, men tónleikarar, tónleikasøgumenn og granskarar eru allir á einum máli um, at verkið frá 1741 ber av í dygd og vakurleika. Frá fyrsta degi hevur Messias hugtikið og er í dag uttan iva eitt hitt mest framførda tónaverk úr barokktíðini kring heimin.
Tó at Händel var týskari, so varð tað í Englandi at hann virkaði tað mesta av sínari tíð. Stílurin í tónleikinum hjá Händel er ávirkaður av hansara bakgrund í týskum kirkjutónleiki og hansara mongu ungdómsferðum til Italia, umframt hansara stóra  áhuga fyri fronskum tónleiki. Händel skrivaði tónleik innan nærum øll kend tónleikasløg, men er tað helst oratoriini, sum í dag standa sum týðuligastu varðar í hansara tónleiki. Tað er eisini í oratoriunum at vit síggja ta tónleikaligu breidd, sum eyðkennir Händel, t.d. bera ariunar týðuliga boð um italienska ávirkan, kórsatsirnir eru kjølfestir í týskari polyfoni og instrumentalpartanir hava røtur í fronsku overturini.

Kenslur og tónleikur
Tónleikur hevði í barokktíðini sum eina av sínum høvuðsuppgávum at lýsa kenslurnar ella affektinar hjá menniskjum. Útgangsstøðið var grikska etoslæran, sum sigur, at í tónleiki er ein íborin eginleiki til at ávirka menniskju á ymiskan hátt. Serliga var tað í teirri tá í tíðini nýggju tónleikagenruni, operatónleikinum, at hetta tónleikaestetiska fyribrygdi, affektlæran, kom til sín rætt. Tær skiftandi sinnisstøðunar hjá ymisku persónunum í operuni skuldu tónasmiðurin royna at lýsa í tónum eisini.
Tónasmiðurin og tónleikateoretikarin Johan Adolph Scheibe (1708-76) skrivaði í Der kritische Musikus: “Vit hava í tónleikinum við sinnisrørslur at gera; tónasmiðjurin skal úttrykkja, styrkja ella doyva tær.” Hetta var sambært Scheibe ein av høvuðsuppgávunum hjá tónasmiðjunum. Barokktónasmiðirnir høvdu so við og við hópin av konventionellum tónleikahættum til at úttrykkja kenslur við, eitt nú gleði, sorg, øði, angist, pínu osfr. Í kirkjutónleikinum vóru tað sostatt trúarinnar affektir, sum tónaskøldini skuldu klæða í tónleikaligan búna. Berandi lutir í Oratoriinum Messias eru eisini júst slíkar átrúnaðar affektir,  so sum gleði og takksemi fyri lívið, skaparverkið og uppreisnina, sorg og angist fyri deyðanum og vónin og longsulin mótvegis ævigum lívi.
Tó er hetta ikki at skilja so, at tónasmiðirnir vóru bundnir niður av hesum tónlistaligu ”viðtøkum”. Barokktíðarskeiðið er nevnuliga merkt av stórum ymiskleika tónaskaldunum ímillum, ikki minst tá hugsað verður um tónleikaslag, uppfinningarsemi og talent, og einki er at ivast í, at Händel saman við javnaldranum J.S. Bach skaraði fram úr í so máta.

Messias
Longu frá byrjan í verkinum eru dømi um hvussu tónleikurin verður brúktur til at úttrykkja nakað ávíst. Ouverturan, sum er ein typisk sonevnd  “fronsk ouvertura”, sum Händel skrivaði eitt ótal av, stendur í e-mol, meðan arian sum kemur aftan á stendur í E-dur. Við hesum skifti frá mol til dur undirstrikar Händel tey uggandi orðini: “Troystið, troystið, fólk mítt”. Eitt annað dømi er í kórsatsinum “For unto us a Child is born” (“tí barn er okkum føtt”). Hesin kórsatsurin verður roknaður sum eitt stórt fagnaðarróp yvir undrið, at Frelsarin einaferð skal verða borin í heim. Í satsinum verður orðið “born” (føtt) sungið í einum sonevndum koloraturi (eitt rað av skjótum tónum), sum undirstrikar stóru gleðina yvir barnið. 
Í tí so sera kenda Halleluja-kórinum endar Händel annan part, um Jesu líðing, deyða og uppreisn, við einari stórbærari lovprísan í tónleiki. Hetta tónleikaliga gleðisróp er ikki bara at skilja sum endin av øðrum parti í Messias, men eisini at Guð endaliga hevur víst sína megi við Jesu uppreisn frá deyðum.

Eitt oratorium
Messias er eitt sonevnt oratorium, sum vanliga merkir eitt størri tónaverk við kristiligum innihaldi fyri solistar, kór og orkestur. Teksturin er ofta tikin meira ella minni beinleiðis úr Bíbliuni, serliga úr gamla Testamenti. Teksturin til Messias er tó óvanligur í oratorium-produktiónini hjá Händel, tí her verða tekstir tiknir bæði úr Gamla- og Nýggja Testamenti. Nøkur beinleiðis søgugongd er ikki í Messias, sum vit t.d. kenna tað frá Passiónunum hjá J.S. Bach, men tætta sambandið millum teir profetisku tekstinar og Jesus sum Messias ger oratoriið til eina miðvísa religiøsa forteljing um profetiini, sum við Jesusi ganga út. 
Messias verður roknað sum eitt ikki-dramatiskt oratorium. Tó skínur ígjøgnum, at Händel í 1741 longu var ein drivin opera-tónasmiður. Her verður m.a. hugsað um tey accompagneraðu recitativini, sum Händel brúkar í Messias og sum ikki vóru vanlig í kirkjutónleiki. Eisini eru nógvir av koloraturunum bæði í solo-pørtunum og kórpørtunum sprotnir í italienskum operasangstíli. Teir nógvu kórsatsirnir og bygnaðurin í teimum vísa eina greiða ávirkan frá enskari siðvenju, tær sonevndu Anthems, sum serliga Purcell var kendur fyri.

Konsertir um vikuskifti.
Havnarkórið og orkestur við Ólavi Hátún á odda hava tvinnar framførslur av Messias á skránni um vikuskifti. Hin fyrr verður í Fuglafjarða kirkju leygardagin kl. 17.00 og hin seinna í Vesturkirkjuni sunnudagin kl. 16.00. Báðar konsertinar eru sum vanligt ókeypis, men høvið verður at stuðla tiltakinum við einari peningagávu.

Coda
“Skundisliga tók Händel gásafjøðurna og skrivaði nótar á blaðið. Við gandakendari ferð birtist eitt tekin fyri og annað eftir. Hann fekk ikki steðgað aftur, hann varð drigin við, sum eitt skip fyri fullum seglum. Náttin var friðalig, tigandi hvíldi tunga myrkrið á tí stóra býnum. Men inni í honum streymaði ljósið og óhoyrandi endurljóðaði stovan alheimsins tónleik”. (Stefan Zweig: Sternstunden der Menscheit)