I kvøld verður kjak
millum Kinnu Poulsen og Bjørn Kalsø í Degi og viku. Kjakið fer at snúgva seg um ætlaða niðurskurðin
í játtanini til Mentanargrunn Landsins.
Hetta er eitt
neyðugt kjak. Tað er neyðugt, at vit kenna avleiðingarnar av niðurskurðinum, og
tað er neyðugt, at miðlarnir seta mentanina í miðdepilin. So eg vóni at nógv fara at
hyggja.
Og eg vóni eisini, at miðlarnir ikki fara at sleppa hesum máli.
Tí eg var sjálvandi
bilsin, tá eg las uppskotið til fíggjarlóg, men eg eri enn meira bilsin nú, tí
onki sakligt mótspæl er komið frá anstøðuni. Onkur hevur gramt seg á facebook,
men ongin hevur tikið ábyrgd og víst ágrýtni. Tað tykist mær snedigt. Hava tey givið skarvin yvir?
Niðurskurðurin í
játtanini til mentanargrunnin vísir best, hvør politisk hugsjón nú er ráðandi.
Ein hugsjón, sum gevur fyrimunir til úrvaldar bólkar og sum máar burturav
teimum virðum, sum vit øll skulu verða felags um.
Vit kunnu bara
staðfesta, at vit liva undir einum stýri, sum ikki blunkar at skera 20 prosent
av mentanarstuðlinum, men aldrin kundi droymt um at skorið fiskidagarnar 20
prosent, at skorið fiskimannafrádráttin 20 prosent ella at lagt 20 prosent ella
20 oyru avgjald á makrelfiskiskapin.
Men at tey somu, sum fáa fyrimunirnar frá hesi samgongu, ja tey skulu so eisini
brúka listafólk í marknaðarføring og branding fyri tey kunnu tjena enn meiri.
Kann vera, at ein
milljón og 200.000 ikki er nógv hjá markelmonnunum, men tað eru nógvir pengar
hjá menta- og listafólki í Føroyum.
Men vit eiga eina
andstøðu, og vit muga forvanta, at tey eiga eitt mótspæl. Kanska er tíðin komin
til, at krevja okkurt av anstøðuni eisini og biðja onkran av teimum koma í Dag
og viku í morgin. Hvat fer andstøðan at gera við niðurskurðin?
