Monday, June 17, 2013

Svar frá Havnarmeistaranum um Eystaru Vág



Eg skrivaði 6.juni fyrispurning til Tórshavnar Kommunu um at fá eina grundgeving ætlanina við Eystaru Vág. Enn hava vit bara hoyrt politikarar og havnameistara grundgivið og eg kundi hugsað mær eina grundgeving frá teimum (arkitektar/byggifrøðingar osfr), sum hava gjørt ætlanina. Í brævinum skrivaði eg, at havnamyndugleikarnir óbeinleiðis hava víst á eina loysn, tá teir hava grundgivið fyri útbyggingini í miðlunum. Aðalmálið við útbyggingini er sambært Havnamynduleikunum at býta sundur tvær fullkomuliga ymiskar funktiónir; frakt og ferðafólk. Í staðin fyri at útbyggja hesar báðar funktiónir, sum ikki hava nakað við hvørja aðra at gera, mitt í Havnini - spurdi eg um tað hevði borið til at gjørt neyðugu tillagingarnar í verandi havn í Tórshavn fyri ferðafólkaskipum og flutt fraktina til eina útbygda havn í Kollafirði. Eg havi ikki fingið svar frá nøkrum arkitekti ella byggifrøðingi. Eg havi fingið svar frá havnameistaranum, og tað snýr seg primert um havnaviðurskifti við praktiskum atlitum til vinnu og ferðslu. Eg seti svarið inn  her:


Í telduposti frá Kinnu Poulsen, dagfestur 6. Juni 2013, verður biðið um:

1. Grundgeving fyri útbyggingini
2. Svar upp á uppskotið um at flyta fraktina til eina útbygda havn í Kollafirði.

Dýpi fram við Eystara mola og í innsiglingin er ov lítið. Hetta viðførir, at tá verðandi bingjuskip liggja við bryggju, er neyðugt at leggja fendarar millum skipið og bryggjuna. Hetta er ikki nøktandi, og ger tað ómøguligt at fáa størri bingjuskip til bryggju, enn tey verðandi. Alt fleiri ferðamannaskip, sum sigla á okkara leiðum, kunnu ikki koma til bryggju, tí dýpið er ov lítið. Tað ber ikki til at dýpa meira fram við verðandi bryggju, uttan at ein heilt nýggjur bryggjukantur verður gjørdur fram við verandi bryggju. Innsiglingin, millum verandi mola og Viðarnes, er áður dýpt niður á 10 m, og er tað tí sera trupult at dýpa aftur.

Kajplássið, serliga um summarið, er avmarkað. Hetta merkir, at tað ikki ber til til at avgreiða tey størru ferðamannaskipini og bingjuskipini samstundis. Heldur ikki ber til at vaksa um møguligt annað virksemi, tí tað má verða pláss til bingjuskipini, sum sigla í fastari rutu, eins og ferðamannaskipini, sum hava fingið játtað pláss langt frammanundan. Økið til bingjur og trailarar er ov lítið. Økið til bingjur og trailarar er ov lítið. Hetta merkir at tað blíva alt ov nógvar flytingar, og harvið blívur arbeiðsgongdin óeffektiv. Tað er onki pláss til vøkstur. Økið til pakkhús o.a. er ov lítið. Av tí at bingjuøkið, er ov lítið, ber ikki til at byggja goymslubygningar o.a., sum tørvur er á til havnavirksemið. Økið til avgreiðslu av ferðafólki og bilum er ov lítið. Tað er alt ov lítið pláss til at ferðafólk og bilar, serliga um summarið. Ein víðkan av havnaøkinum hevði gjørt tað møguligt at umskipa økið rundan um farstøðina, soleiðis at betri pláss varð til tey ferðandi.

Við hesi útbyggingini skulu tað vera tvær innkoyringar til havnaøkið. Verðandi innkoyring, sum í høvuðsheitum skal brúkast av teimum, sum hava samband við ferðafólk, og nýggja innkoyringin, sum verður vestan fyri stóru húsini hjá Færøernes kommando, sum skal brúkast av teimum, sum hava við frakt at gera. Tað er ikki so heilt einfalt at skilja ferðafólkaskip og frakt heilt sundur, tí fluningsmynstrið hjá okkum er soleiðis háttað. Norrøna er t.d. eitt ferðafólkaskip, sum eisini flytur stórar nøgdir av frakt. “Cruiseskipini” eru at kalla bara á okkara leiðum 3 mánaðir um summarið, tí kann tað vera skilagott at tey brúka somu havn, sum onnur skip. Um vit skuldu brúkt havnina í havn burturav til ferðafólkaskip, hevði havnin í Havn ligið at kalla óvirkin 9 mánar um árið. Havnin í Kollafirði er útbygd nógv seinastu árini. Har er stórt virksemi við kryvjing av laksi, og eitt stórt arbeiðspláss í sambandi við uppisjóvarvirkið. Á Oyrareingjum er øki og bryggja, har bingjuskip koma og fara regluliga. Um útbyggingarætlanin í Havn skuldi verið flutt til Kollafjarðar, hevði hon fylt sera nógv á fjørðinum. Við at byggja í Havn nú, hava aktørarnir í Havn pláss at veksa um sítt virksemi, samstundis sum umstøðurnar hjá ferðafólkaskipunum batna munandi, eins og verandi aktørar í Kollafirði eisini hava møguleika at vaksa um sítt virksemi. Ætlanin, sum nú liggur á borðinum, hevur verið umrødd við fornminnis myndugleikan fyri nógvum árum síðani. Tað verður framhaldandi samskift við fornminnis myndugleikan, soleiðis at vit finna eina góða loysn fyri økið rundan um Skansan.

Vinarliga
Jónsvein Lamhauge, havnarmeistari