Í
dag er freist fyri innlatin av lógaruppskotum og vit sita spentar við telduna
og bíðja eftir broytingum, sum verða mentanini at bata. Longu frá 28.februar er
komið eitt mentanaruppskot, tað er frá Gunnvør Balle í Tjóðveldi og er
eitt uppskot til samtyktar um at stovna ein filmsgrunn
”Endamálið við hesum uppskoti er”,
skrivar Gunvør Balle, ”at tryggja betri kor fyri føroyska filmslist.
Filmslistin hevurseinastu árini av álvara tikið seg upp sum ein vaksandi
listagrein í Føroyum. Í fjør vórðu tvey av okkara ungu gávuríku
filmslistafólkum heiðrað við peningagávu fyri teirra avrik á hesum øki, og vit vita,
at fleiri føroyingar eru undir útbúgving innan filmslist. Eingin ivi er um, at
vit her hava eina listagrein, sum hevur góðar møguleikar at røkka út í heim og
gerast enn ein týdningarmikil táttur í okkara mentanarlívi. Ein fortreyt fyri,
at henda listagrein kann fáa fótin fyri seg, er tó, at møguleiki er fyri at
søkja stuðul til filmsgerð. Filmsgerð er kostnaðarmikil listagrein, og neyðugt
er, at landið í eini byrjanartíð setir í minsta lagi 500.000 kr. av til
filmslist um árið. Upphæddin eigur at vaksa stigvíst eftir nærri ásettum lykli.
Sjálvt ein so avmarkað upphædd hevði gjørt nógvan mun og hevði latið upp fyri
møguleikanum, at fáa atgongd til stuðul úr útlendskum grunnum. Úrslitið fer
uttan iva at síggjast aftur í fleiri nýggjum føroyskum filmsframleiðslum. Tað
sømir seg ikki, at landið onga stuðulsjáttan hevur til filmslist, tá hugsað
verður um týdningin av hesi listagrein, og tá vit síggja, hvussu nógvir ungir
føroyingar hava vilja og evnini at gera seg galdandi innan filmslist. Norðurlandahúsið
og Filmsverkstovan Klippfisk hava í felag stovnað ein filmsgrunn, sum hevur til
endamáls at stuðla nýggjum føroyskum filmsverkætlanum. Grunnurin hevur eina játtan
á kr. 200.000,- um árið, sum er latin av Norðurlandahúsinum. Hesin stuðul hevur
víst seg at gera stóran mun og ger tað møguligt at søkja stuðul úr útlondum. Harumframt
stuðlar Tórshavnar Kommuna Klippfisk í sínum dagliga virksemi. Sostatt hava
aðrir partar langt síðan sæð stóra tørvin á at skipa stuðulsmøguleikar fyri at
menna filmslistina, tað vantar bert, at landið tekur ábyrgd av hesum partinum
av listini eisini.”
