Wednesday, March 20, 2013

Eitt høvuðsverk í føroyskari myndlist



Hesa myndina málaði Rannvá Kunoy og var hon partur av Summarframsýningina í Norðurlandahúsinum í 2010.Eftir míni meting er hon eitt høvuðsverk innan føroyska myndlist, ein vøkur og mystisk mynd, har listakvinnan á tilvitaðan hátt spælir við okkara fatanarevni og okkara assosiatiónsevni. Rannvá Kunoy er millum listafólkini, sum í nýggju uppheinging Listasavnsins verða útihýst. Tvær myndir frá hennara fyrstu framsýning í Listasavninum í 1999 hanga í løtuni í gamla sali i Listasavninum, men henda framsýningin verður tikin niður aftur, tá nú Várframsýningin um stutta tíð yvirtekur framsýningarrúmið. Eg skrivi eitt ummæli av nýggju uppheinging Listasavnsins, sum fer at koma í einum nýggjum mentanartilleggi í Dimmalætting, sum Inger Smærup Sørensen ritstjórnar. 

Í sambandi við Summarframsýningina vóru gjørdir nakrir fínir stuttilmar, har ymisk fólk siga hvussu tey uppliva nakrar útvaldar myndir hjá Rannvá Kunoy. Í hesum filminum tosa tey um omanfyri nevndu mynd, millum ummælararnar kenna vit aftur fleiri høvundar. Steinbjørn B.Jacobsen sáli er áhugaður og við uppá listina, sum hann altíð var og eisini Carl Jóhan Jensen, ið nevnir tað káma, men sum heldur, at um mann hyggur eina løtu, byrjar ymiskt at taka seg upp í mynduni...








(KP)