Aftaná eina órímiliga drúgva summarfrítíð er mentanarlívið nú aftur við at
ressa seg. Hetta er tíverri ikki soleiðis at skilja, at nakrar mentanarsendingar
av tí slagnum, sum viðgera list, eru byrjaðar aftur í Kringvarpinum, tí hesum bíða
vit enn eftir. Við nøkrum fáum undantøkum hevur listasummarið verið rættiliga deydligt. Men nú er okkurt spennandi í væntu, sum skilst verður eingin Heystframsýning og henni verður saknur í, men Hanni Bjartalíð er á skránni í Listasavninum í oktober.
Tær ymsu
mentanarligu nevndirnar í Tórshavnar Kommunu munu vera farnar til arbeiðis. Tí um hálvan september
og tað vil siga í næstu viku fáa øll listafólkini, sum hava sent uppskot at prýða
Boðanesheimið, boð um hvørt tey sleppa framat ella ikki. Tórshavnar Kommuna
hevur sum kunnugt avgjørt, at 1,5 prosent av byggikostnaðinum skulu brúkast til
at listprýða nýggjar bygningar hjá kommununi og í sambandi við Boðanesheimið talan um 800.000 krónur. Tað er Listabólkurin hjá Tórshavnar
Kommunu, sum avger hvør skal prýða Boðanesheimið.
Nevndirnar, sum skulu avgera
hvør fær M.A.Jacobsens virðislønirnar eru
helst eisini farnar til arbeiðis, tí hesar virðislønir verða vanliga lætnar á
føðingardegi M.A.Jacobsens og tað er um 10 dagar hin 17.september. Meira um hetta seinni.
