Heystframsýningarbólkurin hevur Summarframsýning!

 Leygardagin 20. juli kl 15 letur Summarframsýningin hjá Heystbólkinum upp í Listahøllini á Rundingi í Skipasmiðjuni í Havn. Tað kann tykjast eitt sindur ørkymlandi, at Heystbólkurin letur upp framsýning um summarið. Men listafólkini í bólkinum hava í nøkur ár umhugsað at sýna fram um summarið, tá útisetar og ferðafólk eru í Føroyum. Nú verður hetta so roynt í ár.

Listahøllin í Skipasmiðjuni, úti á Rundingi, er vorðin ein fastur táttur í framsýningarlívinum í Havnini, eftir at hava hýst Heystframsýningini á hvørjum ári frá 2005 til 2011. Eisini hava einkarframsýningar verið um summarið, og um Ólavsøkutíð. Anker Mortensen, Bárður Jákupsson og Tróndur Patursson hava haft framsýningar í Listahøllini um summarið, ið eisini vóru opnar á Ólavsøku, og vóru tær væl vitjaðar. Nakrar sonevndar ateliérframsýningar hava eisini verið.

Tað er vorðin ein góð listaruta um Ólavsøkuna, at fara frá Norðurlandahúsinum oman í Listasavnið, víðari oman á Skálatrøð í gallaríið hjá Steinprenti, í Müllers Pakkhús og, sum rosinan í pylsuendanum ber nú eisini til at gera eitt rend út í Listahøllina á Rundingi. Summarframsýningin hjá Heystbólkinum er tó ikki bert ein Ólavsøku- og ferðafólkaframsýning. Framsýningin í ár verður, eins og undanfarin ár, ein framsýning har listin verður sett í hásæti. Tað er listin, ið er drívmegin í Heystbólkinum. Bólkurin er samansettur av ógvuliga ymiskum listafólki, men øll hava listina sum høvuðsmál og møguleikan at sýna fram í einum hølum, sum eru unik. Hesi høli hava saman við listini megnað at hildið hesum hópi av listafólkum saman í øll hesi árini, tó at limirnir í bólkinum eru spjaddir um fleiri lond og øll, í hvør sínum lag, hava nógv at gera við egið listarligt virksemi.Eitt týdningarmikið mál hjá bólkinum er, at tað altíð eru nýggj verk hjá hvørjum einstøkum listafólki, ið verða framsýnd.

Tey, ið eru við á framsýningini í ár, eru: Andrias Andreassen, Bárður Jákupsson, Bjarne Werner Sørensen, Brandur Patursson, Hansina Iversen, Hjördis Haack, Marius Olsen, Torbjørn Olsen, Tróndur Patursson, Tummas Jákup Thomsen og Zacharias Heinesen. Gestur er Ilona Raipala úr Finlandi.

Zacharias Heinesen

Bjarne Werner Sørensen

Bárður Jákupsson

Hjördis Haack

Marius Olsen