Hamferð dugir sín dómadag...

Ein av teimum stuttligastu mentanarlýsingunum, sum eg upplivdi í síðstu viku var avgjørt Facebook-fráboðanin hjá gittarspælaranum í Hamferð, John Egholm, ið ljóðaði soleiðis: "Eri passaliga deprimeraður til Hamferð konsertirnar fyri framman. Kom til Syðrugøtu og blív deprimeraður. Kom til Havnar og blív deprimeraður. Kom til Tvøroyri og blív deprimeraður. Far so til helvitis heim aftur.". Leygardagin, tá Hamferð hevði konsert í Sjónleikarhúsinum í Havn, høvdu vit 4 ára føðingardag her í húsinum og tað var alt annað enn deprimerandi, men hevði við sær, at eg ikki náddi konsertina og TAÐ er í grundini deprimerandi, tí hesin bólkurin er serstakliga áhugaverdur.

Hamferð varð herfyri í Planet Awards kosin Ársins nýggi bólkur og bólkurin vann somuleiðis talentkappingina Sement 2010. Bólkurin hevur júst givið út framúrskarandi fløguna "Vilst er síðsta fet" og lesarin hevur kanska longu lagt til merkis ta vøkru, myrku útgávuna av sálminum "Harra Guð títt dýra navn æra", sum hevur verið spæld nakrar ferðir í útvarpinum. Jú, Hamferð dugir sín dómadag - einki at ivast í tí og teirra tulking av sálminum hjá Peter Dass sampakkar ómetaliga væl við lagnutunga dómadagshuglagið, sum sálmurin frammanundan er merktur av, har tað aftur og aftur verður staðfest hvussu týdningarleysur og óstøðugur menniskjaheimurin er í mun til Guðs stórsligna ævinleika. Hamferð er áhugaverdur bólkur, sum hevur avgjørt bert at brúka føroyskar tekstir. Tekstirnir eru sum heild serstakliga patetiskir, merktir av hátíðarligum vónloysi.

Hamferð spælir sonevndan doom-metal. Hetta er rokktónleikur, ið so mikið tungur og myrkur, at teir ikki sjáldan nerta tað klisjémerkta. Men av tí, at dygdin er so góð sum hon er, bæði á framførslu og framleiðslu, gerst tú sum áhoyrari rørdur av hesum øgiliga, grumma dreingjauniversinum og av konsekventa háttinum, sum hesin heimur verður framborin. Eg havi enn ikki hoyrt allar sangirnar, men skilji, at teir sum heild eru serstakliga langir og seinir og tað er eitt eyðkenni fyri tónleikaslagið doom skilst á allýsingini av tónleikaslagnum á Wikipedia, sum nevnir fleiri undirsjangrur sum funeral doom og death doom, ið eyðsýniliga sameinir myrka dapra huglagið frá doom metal við growling, sum kemur frá death metal. -So vita vit tað, men óhugnaligi dámurin av hesum djúpa barkaljóðinum er rættiliga ítøkiligur, tí tá eg spældi "Vráin" hugdi lítli sonurin ikki sørt imponeraður upp frá legokubbunum í tí hann spurdi: "Monstir?".

Hamferð eru: Jón Hansen, sum syngur, John Egholm og Theodor Kapnas, ið spæla gittara og Tinna Tótudóttir sum spælir bass. Remi Johannesen spælir trummur og Esmar Joensen keyboard. Vit seta inn tekstin til Vráina inn her, umframt nakrar leinkjur. www.facebook.com/hamferd www.myspace.com/hamferd
(KP)



VRÁIN (Jón Hansen)

Ravnar

Arnfuglar

Stoyta meg

Út av tromini



Djórið

Lúrandi

Læsur meg

Inni her



Sorgin

Deyðin

Gráturin

Saknurin

Eingin kann

Vekja meg

Leiða meg

Heim til tín



So bundin

Steinsettur í hesi vrá

Har myrkrið floymur

Til og frá



Vardur

Tryggur



Tú leitar (svart svíður sár)

Men sumt kann ei finnast (og farin ár)

Og eg svinni meir (so kám)

Fyri hvønn andadrátt (handan tár)



Her, í leinkjum

Liðini, hvørt sterkari enn annað

Hví kann eg ikki bróta bara eitt

Men eg síggi ei liðini

Eg síggi bert fuglarnar



Ravnar

Arnfuglar

Skræða meg upp

Gloypa míni sál



Eg biði teg

Vak nú meg

Leið nú meg

Heim til tín