Tíðindaskriv: Vakurt og meistarlig​t - konsertir við Michalu Petri og Ólavi Jakobsen

 "Eg havi ikki orð fyri hvussu frálík Ólavur og Michala eru, men sum við øllum fantastiskum tónleikarum, so virka tey eitt við síni ljóðføri.”

Soleiðis tók ummælarin Niels Uni Dam til, tá ið tey framførdu á Mentanardegnum á Sandi í fjør summar. Hetta var fyrstu ferð tey bæði, Michala Petri og Ólavur Jakobsen, spældu saman. Nú vera tey so aftur at hoyra í Norðurlandahúsinum og í Fuglafjørð.

Vit eru so heppin, at vit hava fylgt heimskenda floytuleikaranum Michalu Petri, síðani hon blaðung framførdi á fyrsta sinni her á landi. Síðan hevur hon vitjað javnan. Alt meðan hon hevur vunnið sær frama sum hin fremsti tónleikarin á ljóðføri sínum, blokkfloytuni, ið hon hevur lyft upp á eitt støði, ið ongantíð er sæð fyrr. Hon hevur vunnið allan tann altjóða heiður, ið ein tónleikari yvirhøvur kann og hevur framført við mætastu dirigentum og orkestrum kring allan knøttin.

At framføra við sær hesuferð, hevur hon valt fremsta, føroyska gittarleikaran Ólav Jakobsen, ið hevur drúgvar royndir sum solistur, kamartónleikari og eisini kendur sum frásøgumaður á Nýggjárskonsertini.

Tey bæði hava sett saman eina sera fjølbroytta skrá, har ið vælljómandi, virtuosur og spennandi tónleikur verður spældur. Alt bundið saman við lættleika í spæli og nærveru við lurtaran við frágreiðingum um tónleikin.

Tónleikurin spennir sera víða í tíð. Tónleikur frá Bach og Haendel til Piazzolla, úr Kina til Føroyar, frá aldargomlum løgum til forkunnugt og nýtt, sum í teirra hondum fær lætt flog.

Ella sum Niels Uni Dam í áðurnevnda ummæli eisini tók til: “Tey eru so góð hvør sær, men saman rann tónleikurin upp í eina hægri eind, tað var vakurt og meistarligt.”

Konsertirnar eru hesar:

Sunnudagin 25. mars kl. 16.00 í Norðurlandahúsinum (kostn. 170,- kr / Skúlaungdómar ókeypis) keyp atg. á  www.nlh.fo
Týskvøldið  27. mars kl. 19.30 í Fuglafjarðar kirkju (ókeypis)

Øll eru hjartaliga vælkomin á konsert