Í fýra ár hava
vit hvønn dag havt innlegg um list og mentan. Tað er liðugt frá í
morgin. Vit hava avgjørt at brúka
summarið til at umhugsa listabloggin, og hetta er sostatt síðsta
innlegg fyri hesa ferð. Møguliga venda vit aftur onkursvegna, alt
stendur opið.
2337 innlegg
og ein hálv millión av vitjandi bleiv tað til hesi fýra árini.
Tað hevur verið ómetaliga stuttligt og avbjóðandi og vit eru
ófatiliga stoltar av tí, sum vit hava fingið frá hondini. Vit
føla, at vit hava víst, at tað kann lata seg gera at framleiða
týdningarmikið mentanartilfar at kalla uttan pengar. Vit føla, at
vit hava havt ein týdningarmiklan leiklut í mentanarlívinum.
Tá vit fyri fýra
árum síðani avgjørdu at gera bloggin, varð hetta avgjørt í
einari stuttari telefonsamrøðu. Tað tók heldur ikki meira enn 10
minuttir í telefon at avgera, at vit skulu lata bloggin í sínum
núverandi skapi vera fortíð. Tí endurnýggjan hevur stóran
týdning fyri okkum og aftan á fýra ár halda vit, at vit hava havt
kvinnuvikur og listaverkfall, talleys ummæli, prik til politikarar,
herðindi av forargilsi um heildarstøðið á mentanarlívinum,
hugtikin útbrot um listina og yvirhøvur alt, mann kann ímynda sær
- vit hava bara ikki havt nakra teinkipausu.
Vit eru spentar uppá
hvat teinkipausan fer at føra við sær og hvat vit fara at finna
uppá. Vit byrja hana við at fáa okkum ein bita og skála fyri
blogginum, okkum sjálvum, listafólkunum og okkara kæra útgevara,
John Dalsgarð, umframt tykkum kæru lesarum, sjálvandi.
Túsund takk, góðu
tit øll fyri hesa fýra árini.
Blíðar heilsanir
Kinna og Inger
