SAMBANDSFLOKKURIN Á CHRISTIANSBORG: Mentanarnevndin hjá Fólkatinginum arbeiðir fyri, at føroysk lista- og mentafólk fáa nýggjar møguleikar at søkja um fíggjarligan stuðul til mentanarligt arbeiði og verkætlanir
- Hetta sær spennandi út og kann vónandi gerast ein styrki fyri føroysk listafólk, list og mentan sum heild.
Tað sigur Edmund Joensen, fólkatingsmaður Sambandsfloksins, nú
mentanarnevndin hjá Fólkatinginum vil lata upp fyri, at lista- og
mentafólk í øllum Ríkisfelagsskapinum á javnbjóðis grundarlagi kunna
søkja fíggjarligan stuðul til mentanarligar verkætlanir.
- Sambandsflokkurin og Vinstriflokkurin hava, saman við øðrum
flokkum, arbeitt miðvíst við hesum máli, og nú er felags vilji til at
sláa eitt slag fyri mentanini í øllum Ríkisfelagsskapinum. Hetta fegnast
vit øll um, tvørtur um floksmørk, sigur Edmund Joensen.
- Uppleggið er, at danski mentamálaráðharrin, Marianne Jelved, fer
at seta seg í samband við landsstýrismenninar í mentamálum í Føroyum og
Grønlandi, ávíkavist Bjørn Kalsø og Mimi Karlsen. Saman skulu tey leggja
leistin fyri nýggju stuðulsmøguleikunum, sigur fólkatingsmaðurin.
Hann vónar, at fólk í lista- og mentanarumhvørvinum í Føroyum taka
væl ímóti hesum nýggja táttinum í samstarvinum innan Ríkisfelagsskapin.
- Vónandi kann komandi leisturin fyri stuðul vera við ti at styrkja
alt mentanarøkið - eisini ta stóru menning, ið t.d. er innan films- og
tónleikalistina, ið fleiri vænta sær nógv av frameftir, sigur Edmund
Joensen.
