Tað lætta valið

 

Seinnapartin byjra olympisku vetrarleikirnir hjá Putin, og kanske eru  summi, sum lesa hetta, ið ætla at hyggja eftir upplatingarfagnaðinum í sjónvarpinum. Men millum klokkan 17 og 19 hendir nakað í Havnini, sum nokk fer at draga tey flestu upp úr sofuni eina tíma ella tveir. Tá fara fimm ung listafólk nevnlig at avdúka, hvat tey hava arbeitt við seinsta mánaðin og tey bjóða eisini til spennandi yrkingar og tónleik – púra ókeypis. Klassiska valið millum ítrótt og list kann vera trupult, men í dag hava vit øll tað lætta valið. Kom í Vinnufram, Hoyvíkvsveg 51 (gamla Rúsan), har tey besta unga føroyska listin verður at síggja, og har verður loyvi til, sum tað ikki verður í Sochi – at mussa hvønn man vil.


https://www.facebook.com/events/603871819687379/?source=1
 

Avdúkan

Listarliga prýðingin av hølunum hjá Vinnuframa verður avdúkað fríggjardagin 7. februar millum kl. 17 og 19. Tá verður eitt heilt serliga tiltak við tónleiki frá Absent Silver King, disking við Sakaris, upplegg frá listafólkunum og yrkingaupplestur.

Seinastu mánaðirnar hava Jón Sonni Jensen, Ludvík á Brekku, Haldis Olsen, Bárður Dal Christiansen og Ólavar S. T. Thorsteinsson - fimm ung evnarík føroysk listafólk - arbeitt av øllum alvi at prýða nýggja stóra eksperimentariuminum hjá Vinnuframa. Hølini skulu brúkast til øll møgulig granskingarseseminar, íverksetaraskeið, verkstovur og ráðstevnur. Tey fimm listafólkini hava prýtt tjúgu stórar skilaveggir, sum kunnu setast saman á óendaliga nógvar mátar og alla tíðina skapa nýggj rúm í rúminum og geva ólteljandi møguleikar fyri visuellum íblástri. Vinnuframi letur á henda hátt list og gransking møtast og skapa eitt rúm, har menning og nýhugsan kunnu kveikjast, tí var tað eisini natúrligt at velja ung listafólk at pryða rúmið.

Øll eru vælkomin fríggjadagin 7. februar millum kl. 17 og 19 í Vinnuframa, Hoyvíksvegur 51 í Havn.

Ung list i Vinnuframa

 

 

Fimm ung evnarík føroysk listafólk arbeiða í løtuni av øllum alvi í nýggja stóra eksperimentariuminum hjá Vinnuframa. Jón Sonni Jensen, Ludvík á Brekku, Halldis Olsen, Bárður Dal Christiansen og Ólavur S.T. Thorsteinsson hava nevniliga fingið til uppgávu at prýða hølið, sum skal brúkast til øll møgulig granskaraseminar, íverksetaraskeið, verkstovur og ráðstevnur. Tey fimm listafólkini skulu prýða tjúgu stórar skilaveggir, sum kunnu setast saman á óendaliga nógvar mátar og skapa nýggj rúm í rúminum og óteljandi møguleikar fyri visuellum íblástri. Vinnuframi hevur ynskt at lata list og gransking møtast og skapa eitt rúm, har menning og nýhugsan kunnu kykna, og tað hevur tessvegna verið natúrligt at lata ung listafólk vera við til at menna rúmið. Prýðingin verður opin fyri almenninginum í februar. Nærri kunning um hetta verður sent fjølmiðlunum.
(IS)

 

Nýtt veggjaprýðí í Sirkus

Í kvøld, mentanarnáttina verður høvið at síggja nýggja veggjaprýðið í Sirkus, sum Brandur Patursson hevur gjørt. Frá klokkan 19 í kvøld ber til at síggja lidna verkið. Tað inniheldur ljósinstallatiónir, so verkið sær ikki tað sama út um dagin og um náttina. Um náttina koma nakrar áhugaverdar effektir fram.














(KP)

Myrkursins Børn - spildurnýggjur leikur á Tjóðpallinum

Enn ein heimspremiera á Tjóðpalli Føroya

MYRKURSINS BØRN

Nýskrivaður føroyskur leikur hevur frumframførsla á Tjóðpallinum 13. Apríl. Hóast so stutt er liðið av 2013, so er hetta triði upprunaføroyski sjónleikurin í ár.

Á einum niðurløgdum kirkjugarði royna fimm fólk at yvirliva í øllum myrkrinum, tey sum bara ikki orka veruleikan og samfelagsskipanirnar. Hetta eru alt fólk sum kundu havt, ella hava havt, týdning í samfelagnum, men bara ikki funnu sítt rætta pláss. Tey vita nógv um sannleikan – men duga illa at handfara veruleikan.

Tá ein maður verður funnin deyður á kirkjugarðinum ein morgun koma ræðulig loyndarmál undan kavi.

Siðamisbrot, barnamisnýtsla og fylgjurnar av at alt verður tagt burtur eru høvuðsevni í nýggja leikinum. Ógvusligu avleiðingarnar av, at vit ikki tora ella megna at taka ábyrgd, men heldur royna at krógva og skava útyvir veruleikan, verða drignar fram í ljósið.

Tað er Súsanna Tórgarð sum hevur skrivað handritið, og hon leikstjórnar sjálv. Afturat sær hevur hon íslendsku Guðrun Øyahals sum tekur sær av pallmynd og búnum. Ljósdesignari er Árni Baldvinsson og ljóðdesignari Jón McBirnie. Tónleikinum stendur Leivur Thomsen fyri.  Leikarar eru Beinta Clothier, Ria Tórgarð, Erling Eysturoy, Hans Tórgarð og Hjálmar Dam.

Myndir: Finnur Justinussen

Um list og líkislist á Boðanesheiminum

Tann tíðindafróði og -kviki Birkbloggur visti í dag at siga, at myndirnar hjá Per Arnoldi eru við at verða hongdar upp og harvið er prýðingin í Boðanesheiminum yviri við Strond í Havn nú við at vera komplett. 

Tað má sigast at vera tveir royndir listamenn, sum Listabólkurin hjá Tórshavnar Kommunu avgjørdi skuldu fáa ta seinastu stóru kommunalu prýðisuppgávuna. Bæði Bárður Jákupsson (1943) og Per Arnoldi (1941) eru kendir ikki bara sum listamenn, men eisini innan listaformidling og administratión í ávikavist Føroyum og Danmark.

Bárður Jákupsson hevur málað fýra stórar kvadratiskar myndir, sum hanga inni í samkomuhøllini á Boðanesheiminum. Tær avmynda oyggjar, hav, fugl og seyð, sum verður lýst á abstraktan dekorativan hátt við einføldum strikutekningum, ið eru kombineraðar við lættar ljóssterkar litfarrar í gulum, violettum, grønum og bláum. Litflatarnir eru settir á løriftið við hvítum steðgum ímillum so at tað minnir um akvarel og klippmyndir. Millum málningarnar ganga nøkur strok á skák, ið eins og fjallaformar binda saman myndirnar. Sjónarringurin er høgur í myndunum við oyggjaskapum, sum vit kenna aftur og sum tykjast avmyndað við panoramiskari frástøðu, meðan myndaliðirnir sum heild tykjast meira abstraktir í forgrundini, har tað ordiliga gongur fyri seg við fýrisligum, rútmiskum strokum. Bárður Jákupsson kennir sítt myndevnið og sítt tøkni og myndirnar fungera væl í ljósu matarhøllini. Millumspælið millum myndirnar tykist óneyðugt og figurativu myndaliðirnir tykjast eitt sindur tvingaðir og yviridylliskir á sama hátt sum tað kundi gjørt um talan var um eina prýðing til børn. Nú er tað jú ikki óhugsandi, at eg fari at búgva á Boðanesheiminum, og tá fari eg møguliga at irriterast um, at listamaðurin hevur roynt at hugsa fyri meg, eina grannvaksna, gamla konu.

Samanumtikið rokni eg tó við, at eg fari at gleðast yvir litir og kompositión í myndunum hjá Bárði Jákupsson, tað gjørdi eg tann dagin herfyri, tá eg var til ervi í Boðanesheiminum. Tíverri kann eg ikki siga tað sama um prýðingina hjá Per Arnoldi, sum eg heilt erligt haldi minna um tað slagi av líkislist, mann plagdi at kunna finna í Idé ella Ilva undir einum skelti, har tað stóð "Ekta list". Plakatirnar, sum Per Arnoldi gjørdi í áttatiárunum vóru áhugavert design til tíðina tá. Myndirnar hjá honum á Boðanesheiminum við reyðum, bláum og gulum fýrakantum á svartari grund síggja út sum óelegantar pastisjur av 80´araplakatunum. Heitið "Færøsk Fantasi" er ein søga fyri seg. Kanska er tað ikki tilvitað og kanska hómast enntá ein heilsan til ta føroysku ekspressivu náttúrulistina í myndunum, men í grundini er heitið so uppblást og innbilskt, at tað minnir um føroyavinarligt koloniharrasnakk av tí ordiliga gamla slagnum. Ímyndið tykkum, at eitt føroyskt listafólk ger myndir til eitt danskt ellisheim og kallar tað "Dansk Fantasi". Nei, ikki ordiliga ha? - Aja, ljósmiklir grundlitir á veggjunum í einum ellisheimi kunnu neyvan skaða, kundi mann mótmælt, - nei men tá eg nú veit hvussu ómetaliga nógv gott finst av føroyskari list og av aðrari list, so er tað forargiligt at síggja hálva aðru milliónir krónur fara so. Boðanesheimið kostaði 100 milliónir og hálvtannað prosent, 1,5 mió krónur er ein heilt øgiliga stór upphædd í føroyskum listahøpi.

Tað var tann 22.februar í 2007, at góða avgerðin varð tikin í Tórshavnar Býráð, ið gekk út uppá, at allar byggiætlanir, sum verða framdar í kommununi skulu brúka hálvtannað prosent av byggikostnaðinum til listarligt prýði. Í reglugerðini sum varð samtykt, verður skilagóður dentur lagdur á, at listkøn mugu vera við í listabólkinum, sum skal avgera hvør skal prýða hvat. Listarligi førleikin hjá hesari nevndini hevur verið umrøddur áður, vit hava gjørt vart við vantandi førleikan og Felagið Føroysk Myndlistafólk hevur eisini mælt til, at listarligi førleikin í Listabólkinum hjá TK bleiv optimeraður. Eg helt, at hetta hendi av sær sjálvum av leiðaraskiftinum í Listasavni Føroya, har Nils Ohrt listfrøðingur varð settur, men nú ivist eg. Eg havi ilt við at finna upplýsingar um Listabólkin á heimasíðuni hjá Tórshavnar Kommunu og teir nýggjastu upplýsingarnar, sum eg finni um Listabólkin hjá Tórshavnar Kommunu eru frá 7.desember, har stendur : "Í listabólkinum eru Jákup Simonsen, mentadeildaleiðari, sum er formaður, Mikael Viderø, Helgi Fossádal og Jógvan Elias Winther Poulsen, sum er skrivari".

Um tað passar, sum her stendur, vantar listarligur førleiki í Listabólkinum og hervið manglar kommunuskattgjaldarin í Havn garanti fyri, at skatturin verður brúktur til dygdarbestu listprýðingina.

Reglugerð

1. Bygging av skúlum, dagstovnum, ítróttarhallum, ellis- og røktarheimum og øðrum

almennum bygningum, sum kommunan stendur fyri, skal fyrireikast soleiðis, at

listarligt prýði verður partur av byggingini.

2. Í byggiætlanini skal verða sett ein upphædd, hóskandi kundi verið 1½ prosent av

byggikostnaðinum, til listarligt prýði. Tó kann meir enn 1½ prosent játtast um tað

gerst neyðugt.

3. Listafólkini kunnu verða við í fyrireikingini av byggingini á sama hátt sum aðrir

ráðgevarar so sum arkitektar og verkfrøðingar.

4. Er talan um heildarveiting frá arbeiðstakara, skal veitarin í sínum uppskoti vísa,

hvussu ætlanin er at myndprýða byggingina, og hetta uppskot skal metast saman við

øðrum pørtum av veitingini, so sum prísi, tilfari og innrætting.

5. Til at ráðgeva býráðnum í spurninginum um list, verður ein listabólkur settur við

umboðum úr byggideildini, mentamáladeildini og listakønum fólki. Listabólkurin

ger uppskot til eina reglugerð at arbeiða eftir, sum verður góðkend av mentamálanevndini.

Fíggjarnevndin 16. februar 2007: Samtykt at mæla býráðnum til at taka undir við

mentamálanevndini.

Býráðið 22. februar 2007: Samtykt uttan atkvøðugreiðslu.

(KP)

Royndir listamenn prýða Boðanesheimið

Ikki kann sigast annað enn, at tað verða royndir menn, sum fara at standa fyri prýðingini av Boðanesheiminum. Teir eru føddir í ávikavíst 1941 og 1943 og báðir hava eina fortíð sum kendir og dugnaligir listmiðlarar. Í gjár kunngjørdi Listabólkurin í Tórshavnar Kommunu, at tað verða føroyski listamaðurin Bárður Jákupsson og danski listamaðurin Per Arnoldi, ið fara at prýða Boðanesheimi. Eftir fráboðanina var onkur skjótur at finnast at, tí tað er ein útlendingur, sum skal prýða Boðanesheimið, men er listin nóg góð, halda vit tað ikki vera nakran trupulleika, um tann eini listamaðurin er dani, tvørturímóti. Og samanumtikið er enn sum áður grund til at fegnast um avgerðina hjá Tórshavnar Kommunu, at lata hálvtannað prosent av byggikostnaðinum til nýggjar byggiætlanir til listprýðing. Í Listabólkinum hjá Tórshavnar Kommunu, ið ger av hvat prýðingaruppskot vinnur, er tað leiðarin í Listasavni Føroya, Nils Ohrt, sum er tann listaserkøni. Hann kennir Per Arnoldi sera væl frá samstarvi í Listasavninum og Nivaagaardsavninum, har  hann arbeiddi áður, teir hava havt ymiskt samstarv, m.a. almennar artist-talk, og eru harumframt eisini vinir. Per Arnoldi er m.a. kendur fyri bjartlittu plakatirnar m.a. til DSB, sum hann gjørdi, og sum vóru frammi í 80´unum. Hann hevur gjørt eina rúgvu av prýðingum mest í Danmark, t.d. gjørdi hann leiktjaldið til nýggju donsku operaina, men hann hevur eisini arbeitt altjóða, t.d. avgjørdi hann í 2000 litirnar til nýggja ríkisdagin í Berlin. Í fjør gjørdist hann formaður fyri Statens Kunstråd, men dvaldist bert eitt hálvt ár í formansstólinum áðrenn hann segði starvið frá sær. Bárður Jákupsson kenna øll listaáhugað, hann var stjóri í Listasavni Føroya ein mansaldur, hann hevur skrivað fleiri týdningarmiklar bøkur um føroyska list, t.d. Myndlist í Føroyum og hevur eisini verið lærari í Føroya Fólkaháskúla. Stílsliga kundi ein hildið, at munurin er stórur millum listamenninar og tað er hann eisini, um vit hyggja at teimum mest eyðkendu verkunum hjá listamonnunum. Rokmiklu, ekspressionistisku náttúrutulkingarnar hjá Bárði kunnu tykjast fjarar frá einføldu DSB reklamumyndini hjá Per Arnoldi, sum minnir um konstruktivismu, De Stijl og popart, men Bárður Jákupsson dugir sanniliga eisini væl at vera einfaldur og hinvegin málar Per Arnoldi eisini málningar, sum ikki eru heilt so einfaldir sum plakatin og báðir duga tað dekorativa. Nú fáa vit at síggja. Við vón um, at Listabólkurin fyrst og fremst hevur havt listarligu góðskuna í huganum gleða vit okkum til at síggja úrslitið. Til lukku Per Arnoldi og Bárður Jákupsson. http://www.moma.org/collection/artist.php?artist_id=5 

http://listinblog.blogspot.com/search?q=B%C3%A1r%C3%B0ur+J%C3%A1kupsson

Tíðindaskriv: Skaldborið og máttmikið listprýði til Boðanesheimið

Tórshavnar kommuna stimbrar listina og harvið lívsvirðið. Tí hevur kommunan í fleiri ár sett av ein ávísan prosentpart av byggikostnaðinum til at listprýða nýggjar bygningar hjá kommununi.

Burtur úr hesum eru komin fleiri prýðilig og væleydnað úrslit. Nevnast kunnu listaverkini hjá Edwardi Fuglø í Skúlanum við Løgmannabreyt og Astri Luihn í Skúlanum á Argjahamri.

Nýggja røktarheimið, Boðanesheimið Yviri við Strond, skal nú listprýðast. Í vár varð arbeiðið at listprýða matarhøll, setstovur, trappu og gongsøkini á heiminum boðið út. Freistin at senda uppskot inn var 15. august og listabólkurin fekk 16 uppskot.

Nógv listalig dygdarverk vóru millum uppskotini, eisini vóru fleiri við sera góðum innihaldsligum hugskotum at loysa uppgávuna.

Tó vóru tvey uppskot, sum skaraðu framúr. Annað uppskotið er skaldborið, frásøgukent og prýðiligt; hitt uppskotið er ein regluføst heild, har kunning, samleiki og ein skemtandi megi knýta heimið saman.

Listabólkurin hjá Tórshavnar kommunu hevur tí avgjørt, at tað verður viðurkendi føroyski listamaðurin Bárður Jákupsson, sum fer at listprýða stóru matarhøllina, og at kendi danski listamaðurin og sniðgevin Per Arnoldi skal listprýða gongirnar og eina av setstovunum.

Listabólkurin er sannførdur um, at valda loysnin tryggjar bæði heild og fjølbroytni, funktión og prýði, umframt nakað skaldborið og máttmikið, sum bæði búfólk, starvsfólk og gestir á Boðanesheiminum fara at gleðast um. Vit fáa ein listaligan vita afturat í høvuðsstaðnum.

5. oktober 2012
Listabólkurin hjá Tórshavnar kommunu

Hansina Iversen prýðir Leirvíkar Skúla

Við tí fyri eyga at gera listina til ein náttúrligan part av gerandisdegnum, hevur Eysturkommuna avgjørt, at eitt prosent av byggikostnaðinum av kommunalum byggiætlanum, skal brúkast uppá list. Nýggi tilbygningurin til Gøtu skúla var tann fyrsta prýðingaruppgávan, sum kommunan við fakligari vegleiðing bað listamannin, Tummas Jákup Thomsen um at gera síðsta summar. Í summar hevur Hansina Iversen prýtt nýggja tilbygningin í Leirvíkar skúla.

Vit halda, at børnini í Eysturkommunu eru sera heppin. Hyggið bara her.

 

http://listinblog.blogspot.com/2010/08/kvinnuvika-listablogginum-hansina.html

Útbjóðing at listprýða Boðanesheimið

Klaksvík satsar uppá listina

Hans Pauli Olsen: Fípan fagra 

Í kvøld var samtykt í Klaksvíkar Býráð at brúka 1,5 % av kostnaðinum av øllum almennum byggiætlanum til list. Vit fegnast um positivu gongdina og ynskja Klaksvíkar Kommunu hjartaliga til lukku við avgerðini.

Hanni Bjartalíð: Tornhytta 

Prýðing fyri milliónir

Fyrradagin varð størsta byggiætlan í søguni hjá Tórshavnar Kommunu, Skúlin á Argjahamri tikin í nýtslu og í gjár vóru vit og upplivdu hálovaða útsýnið úr skúlanum við egnum eygum og tað er av sonnum stórbært. Vit nýttu sjálvandi eisini høvið at skoða sjálvan skúlan og fyrst og fremst hugdu vit at stóru prýðisverkætlanini hjá Astri Luihn, sum við 1,5 % av byggikostnaðinum man vera millum størstu, alment fíggjaðu listarligu verkætlanir her á landi. Latið okkum fyrst og fremst frøast um hesa avgerðina hjá kommununi at brúka hálvtannað prosent uppá list og vóna, at tað verður góðu listini at frama.

Tað kann ikki sigast annað enn, at vit við prýðingini í Skúlanum á Argjahamri hava fingið nógv verk fyri pengarnar, men 2-3 milliónir eru sjálvandi eisini svimlandi upphæddir í føroyskum listahøpi. Nýggi skúlin er fullur av verkum, eitt nú er fitt av teimum ljósu myndunum, sum Astri Luihn sýndi fram í Listasavninum í fjør á framsýningini "Alt tað sum hevur fuglaflog" partur av prýðingini á Skúlanum á Argjahamri. Eg havi sum so ikki broytt meining um málningarnar, síðan ummælið við yvirskriftini "Marengs", men málningarnir hóska frægari í eini reint dekorativari funktión enn teir gjørdu á framsýning í Listasavninum. Umframt málningarnar, sum eru vardir av glasrammum, eru eisini standmyndir, glasmálningar og fleiri sløg av relieffi partar av prýðingini og staðfestast má, at prýðingin av sonnum er fjølbroytt. -Ja, í grundini er stílurin so mikið skiftandi, at tað sær út sum um, at fleiri hava verið um prýðingsuppgávuna; drøg av stílinum í verkum hjá Tróndi Patursson, Guðrið Poulsen og Hansinu Iversen koma til hugs, tá tú gongur runt og hyggur, meðan okkurt tykist meira ella minni anonymt. Best er altíð at hyggja við egnum eygum, men vit seta nakrar myndir inn her.     

Ráðgevarafyritøkurnar at standa fyri verkætlanini vóru valdar eftir einari prekvalifikatiónsrundu. Yvirskipaða hugskotið við bygninginum er »hamarin, fláirnar og løgini«. Løg kann verða tað jarðfrøðiliga, hæddirnar, brúkið ella vitanin. Í miðjuni gongur gjógvin ígjøgnum løgini, sum kann ímynda læring, flokstrin og undirvísingarpartar. Gjógvin sker seg gjøgnum løgini og avdúkar og eggjar til at nema sær kunnleika í einum fluttari merking. Gjøgnum gjónna gongur høvuðstrappan, sum eisini er ímyndin av tí stigvísu læringini. Tá ið tú ert komin niðan á, ber eisini til at skoða inn yvir býin og út í heimin. Samlaði kostnaðurin við øllum er mettur til 199 milliónir krónur. Ráðgevararnir eru: MAP arkitektar – tekning og projekteringsleiðslu. LBF ráðgevarar – berandi konstruktiónir og el. MEL/PBC ráðgevarar – hvs, ventilatión og sprinkling. Høvuðsarbeiðstøkuna og projektleiðsluna hevur byggifelagið Articon. Undirveitarar eru: Demich – hvs, ventilatión og sprinkling. Install – el. Inntakt – takelementir. Skúlin er tvísporaður frá 1-9 flokk. Haraftrat er frítíðarskúlin í skúlanum. Bygningurin er skipaður í fýra eindir, og teir tríggir undirvísingarpartarnir eru í hvør síni eind við felagsøki bæði til lærarar og næmingar. Í tí fjórðu eindini er m.a. dupult fimleikahøll. Skúlastovurnar eru allar á ovastu hædd. Teir yngstu næmingarnir eru í bygninginum, sum er í einari hædd og vendir móti skúlagarðinum og haganum. Tey eru tætt við uttanumøkið. Á henda hátt verður uttanumøkið partur av dagliga virkseminum bæði í skúlatíð og frítíðarskúlatíð. Meðan tey minstu børnini hava umhvørvið tætt við, hava teir eldru næmingarnir havsbrúnna sum mál og mið. Skúlin á Argjahamri er 6.600m² til støddar. Á miðhæddini eru fakhølir, fimleikahøll, umsiting og námsfrøðiligur tænastudepil. Á niðastu hædd eru heilsufunktónir og starvsfólkarúm. Í skúlanum ganga næmingar úr 1. upp í 9. flokk. Skúlaárið 2011/12 ganga 301 næmingar í tilsamans 17 flokkum í Argja skúla. Lærararnir eru 31. Kelda: http://www.torshavn.fo/ 

(Myndir IS Tekstur KP)

Tummas Jákup Thomsen prýðir Gøtu skúla

Við tí fyri eyga at gera listina til ein náttúrligan part av gerandisdegnum, hevur Eysturkommuna í vár avgjørt, at eitt prosent av byggikostnaðinum av kommunalum byggiætlanum, skal brúkast uppá list. Nýggi tilbygningurin til Gøtu skúla er tann fyrsta prýðingaruppgávan, sum kommunan við fakligari vegleiðing hevur biðið listamannin, Tummas Jákup Thomsen um at gera

Tummas Jákup Thomsen er Gøtumaður. Hann er føddur í 1962 og arbeiðir við einum persónligum, surrealistiskum myndamáli, sum bæði er viðkomandi fyri børn og vaksin. Verkini hjá listamanninum hóska til uppgávuna, tí tey um somu tíð eru sterk og følin, stuttlig og álvarslig, dynamisk og rólig. Verkini geva rúminum karakter uttan púra at yvirtaka tað og við serstaka blandingstøkninum við teirri følnu blýantstekningini og sterku primeru litunum, fara tey at geva rúminum lív samstundis sum pláss verður til hugsan. Verkini hjá Tummas Jákupi Thomsen eru nevniliga bæði fantasimerkt og fabulerandi, poetisk, konkret og abstrakt, leikandi løtt og óendalig djúp og allir hesir mótsetningarnir merkja, at verkini fara at geva skúlanum nakað, sum komplementerar skúlarúmið á sera fínan hátt. Verkini megna at liva upp til kravið um eina javnvág millum greiðan samleika og fleksibilitet, og av tí, at tey eru sera modernað samstundis sum tey fyrihalda seg til føroysku listahevdina og til landslagið uttan fyri vindeyguni, fara tey eisini at liva upp til kravið um eina javnvág millum varandi og farandi. Tummas Jákup Thomsen hevur arbeitt við prýðisuppgávuni í fleiri mánaðar og verður hon liðug, tá skúlin byrjar aftur í august. Listamaðurin byrjaði at heingja verkini upp 1.juli. Her eru myndir frá degnum: