Eingladust 24

borgarstjórin

hevur fylt

kramarhúsini

sum hanga

á skalluta

jólatrænum

sum stendur

á grøvini

yvir føroyska

samleikan

á tinghúsvøllinum

við puddilhundalorti

hann vil

gleða børnini

og seg sjálvan

á jólum

(TP)

Eingladust 23

óttin og eg

vit hava tað

so gott

ganga drúgvar

túrar

í brattlendi

og á sløttum

ferðast til

onnur  lond

har frælsi

er eitt fongsul

og tú fært

deyðiligar sjúkur

andar tú ov djúpt

vit vitja ódjóragarðar

í trongum býum

har mordarin eltir okkum

við bangnum eygum

vit heilsa uppá hetjur

í bronzu og kopari

sum droyma

tað sama  sum vit

vit ræðast ongan

óttin og eg

(TP)

Eingladust 22

tónleikurin

hongdur

har glasið

ikki sker

og døggin

er turrur

dreymur

og

morgunin

purrar

mína

sælu

líkasælu

út

(TP)

Eingladust 21

illsintur maður

og eitt borð

og tað sum nú

liggur á gólvinum

sum eitt vælsignilsi

ið krevur eitt vælsignilsi:

spøkilsið

ið vitjaði

meg í nátt

segði mær

at tað var

einki lív

hinumegin

at tað var

eins deytt

og hesumegin

at vit aldrin

høvdu livað

(TP)

Eingladust 20

spegilin

hongur
í andvekri
á vegginum
hann hevur
einki heimland
og kann ikki
bløða men
bert gráta
eitt lítið
sindur tá
eg smílist

(TP)

Eingladust 19

seti meg

sjálvan
á borðið
tá andarnir
koma
á vitjan
í nátt

(TP)

Eingladust 18

sjálvt tá

tey detta
av trøunum
gálva       
bløðini
eftir mær

 

(TP)

Eingladust 17

horntónar

myrkur
og
fløgg

móðurlandskøkan

tornar
í
munninum

løgfrøðin

er
løgin
látur

:::::::::::::

nert ikki

við orðið

tað kann

bíta so tú

vaknar

úr marru

ella eitra teg

við kærleika

so tú ikki vilt

kenna onnur orð

(TP)

Eingladust 16

hon situr

við áarbakkan
og grunar

var tað ljóst

sá hon so

stjørnurnar
um hon grunaði
sum í myrkri


(TP)

Eingladust 15

krossurin

sum hekk
um hálsin
á tí
hálshøgda
verður
seldur
á uppboði
til frama fyri
hvassari
øksum

(TP) 

Eingladust 14

við hvítum

lorti í
munninum
sigur
vetrarsøgan
seg
sjálva
áðrenn
hundurin
lyftir beinið
á frystu orðini
sum eiga valdið
yvir tann annars so gráa býin

 

 

(TP)

 

Eingladust 13

múrurin

varð
laðaður
av
brendum
tonnum

andin

inni
í honum
ræður
enn

 

(TP)

Eingladust 12

stendur á

hondunum
og
minnini
renna sum
sandur
niður í
høvdið
og
tú jarðast
í barndómi

 

(TP)

Eingladust 11

sum ein

gomul ketta
vaknar av
eini mús
hon ikki orkar
at fanga
vakni eg av
einum orði
sum eg gloymi
tá eg skal
skriva tað niður
tí onkur hevur tendrað
eitt jólatræ
uttan fyri
vindeyga mítt

(TP) 

Eingladust 10

aftur og aftur

flytir hon
fingrarnar
fyri hann
á tangentunum

hann skal læra

at spæla
dukka mín er blá

hann dugir stevini

í føroyskum dansi
og hevur lisið
søren og mette

hann hevur sitið

í leypinum
hjá langabba
og gitt gátur
og samstundis talt
seks hundrað og seks og trýss
seyðasparl í øllum túnunum
í heimbygdini

hann skal verða

mentamálaráðharri


(TP)

Eingladust 9

jólatræið

pyntað
við
barnaskøltum
og gomlum
døgum
tá øll vistu
hvar hvør
búði
og
hvat tey ikki
høvdu ráð til
at eta til døgverða


(TP)

 

Eingladust 8

sólin

spyr meg
ikki
um loyvi
tá hon
ger eitt
vindeyga
á kamarshurðina
sum sjálvt
ikki sólin
sær
ígjøgnum

(TP)

Eingladust 7

verðins endi

er rundur
við tveimum
bleikum bøllum
og
einum holi
ímillum
sum er fult
av dingliberum
sum profetarnir
henta og tyggja
við tíðarinnar
eftirgjørdu
tonn

 

(TP) 

Eingladust 6

lýsingarorðið

leiddi meg
inn í
eina
holu
sum nú
er upplýst
av
blindum
navnorðum
og nú
kemur
eitt
sambindingarorð
krúpandi
og tá
rapar

 

(TP)

Eingladust 5

renni

undan
mær

sum um

eg var
ein alda

ið ætlaði

at taka meg
við sær

út aftur

til havs


(TP)