Saturday, September 8, 2012

Heilsan Pól F

Hon er heilar 556 síður, nýggja Pól F bókin, sum Sprotin hevur givið út og sum av sonnum er júst tann gávan, heitið leggur upp til. Bókin er dømi um breiddina í ritverkinum hjá Pól F frá vakrastu fosturlands- og kærleiksyrkingum til skemtiligar, bondskar viðmerkingar til ymiskt, ið fyriferst í samfelagnum. Poetiska góðskan svingar eitt sindur, tað vil so vera, tá tú brúkar yrkingaskapið til viðmerkingar, hittinorð osfr., men nógvar yrkingar eru framúrskarandi og undirhaldsvirðið á bókini er 100 prosent allatíðina í topp, ikki minst í fyrsta tekstinum "Brot úr sjálvævisøgu", Pól F Joensen skrivar soleiðis um lærarayrkið:

"At vera bundin við lærarastarv, tað mest andsoyðandi virki, sum hugsast kann við sínum upp í saman tugdu vevjingum um bábylonskar steinaldarsøgur og jødiskar molbúarafrásagnir og annað putl í lívslanga tíð, tað beyð mínum íborna iva og granskandi viti og villa lyndi so hart ímóti, at eg kvetti av sum tann boheme, eg á botninum eri, og vildi heldur missa eyð enn mítt frælsi...".

Vit ætla komandi dagarna at leggja onkra av teimum fínu yrkingunum út her á bloggin, men lat tað vera sagt alt fyri eitt, at hesa bókina eiga øll tey, sum hava minsta áhugan fyri føroyskum bókmentum at eiga. Hon fæst her: http://sprotin.fo/?sida=utgavur&bok=200&type=1