Wednesday, June 29, 2011

Útlendsk føroysk list

Nakað av kjaki hevur verið á Facebook. Ónøgdin gnagar, tað skilst, og eg skilji tað.

Summarið hevur verið nýtt til føroyska list, verið nýtt til at vísa fram fyri ferðafólkum alla ta framúrskarandi list, sum verður gjørd her á landi. Og í summar hevur Norðurlandahúsið so eina útlendska framsýning.

Mentanarstovnarnir hava tríggjar uppgávur. Ein er at sýna fram føroyska list her á landi, onnur er at gera føroyska list kenda uttanlands og triðja er at sýna fram útlendska list í Føroyum. Hvør av hesum uppgávum hevur størsta týdning, ber ikki til at siga, men vanliga hevur mest verið gjørt við ta fyrstu uppgávuna.

Sjálvt um eg væl skilji, at ferðafólkini skulu sleppa at síggja føroyska list, so haldi eg ikki, at tað er tað einsta tey skulu hava. Í summar eru fleiri føroyskar framsýningar, og ferðafólkini mugu eisini gjarna síggja, at vit hava áhuga í útlendskari samtíðarlist – og harafturat snýr tað seg ikki bara um ferðafólk. Fyrst og fremst snýr tað seg um okkum sum búgva her. Vit skulu hava inspirasjón, íkast og eggjan uttanifrá, annars køvist alt.

Tá útlendsk listafólk koma henda vegin, kyknar eitt samskifti við føroyska list og føroysk listafólk. Listafólk skapa list, sum er ávirkað av umstøðunum og listin her á landi og føroysku listafólkini verða eisini ávirkaði av teimum. Útlendsku listafólkini eru eisini við til at skapa eitt umhvørvi, tey hava tankar við sær um list og listaástøði, sum birtir til listakjak her, og tey taka føroysku listina við sær heimaftur.

Eitt av støðunum, sum so sanniliga hevur gjørt nógv fyri hetta listasamskiftið, er Steinprent, ið hvørt ár fær nógv útlendskt listafólk hendanvegin. Eg dugi ikki orð fyri, hvussu stóran týdning tað hevur fyri okkum, sum arbeiða við list í Føroyum. Men tað nýtist mær heldur ikki, tí eg havi funnið fýra fantastiskar myndir, sum allar eru skapaðar á Steinprent og sum allar vísa, hvussu nógv gott kann spyrjast burturúr, at alt ikki bara er føroysk list.

Tað er ”Villy í Føroyum” eftir Peter Carlsen, ”Mr. Walker í Føroyum” eftir Jan Håfström, ”Klaksvíks tilburðir” eftir Claus Carstensen og “Tinganes” eftir John Körner.





(IS)